Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 548 Hüküm no: 678 Orijinal metin no: [91a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Enserci Şahbaz’ın Duvarcı Yani ve Esteyo’ya hizmetleri karşılığı olan parayı ödemesi Duvarcı tâifesinden Yani v. Reis ve Esteryo v. Dimitri nâm zimmîler Davudpaşa Mahkemesi’nde meclis-i şer‘de Enserci Şahbaz v. Orol nâm zimmî muvâcehesinde bundan akdem Şahbaz zimmînin talebiyle İslâmbol’da (?) mahallesinde vâki‘ beher yevm otuzar para ücret tesmiyesiyle yedişer gün duvarcılık etmemizle ücret-i müsemmâ-yı mezkûreden mesfûr Şahbaz zimmî zimmetinde terâküm eden cem‘an dört yüz yirmi para alacak hakkımızı merkūm Şahbaz zimmîden hâlâ taleb ederiz deyü ba‘de’d-da‘vâ ve’l-istintâk ve’l-inkâr müdde‘iyân-ı mesfûrân Yani ve Esteryo zimmîler ber-vech-i muharrer müdde‘âlarını beyândan âcizler ve talebleriyle merkūm Şahbaz zimmîye yemîn teklif olundukda ol dahi yemînden nükûl etmeğin mûcebince meblağ-ı mecmû‘-ı mezkûr dört yüz yirmi parayı müdde‘iyân-ı mesfûrân Yani ve Esteryo zimmîlere edâ ve teslîme merkūm Şahbaz zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî 15 Ra sene 1197