Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 549 Hüküm no: 682 Orijinal metin no: [91b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Osman’ın Kasap Ali Beşe’den aldığı koyun eti ücretini ödemesi Kasab tâifesinden Ali Beşe b. Mehmed nâm kimesne Davudpaşa Mahkemesi’nde meclis-i şer‘de Mehmed b. Osman nâm kimesne mahzarında bundan akdem mezbûr Mehmed yedimden iştirâ ve kabz eylediği vezn [ve] fiyâtı beynimizde ma‘lûm [ü’l-hudûd] lahm-ı ganem semeninden bâkī zimmetinde on beş guruş alacak hakkım olmağla hâlâ taleb ederim deyü da‘vâ etdikde ol dahi cevâbında müdde‘î-i mezbûr Ali Beşe yedinden ancak sekiz guruş yirmi dört paralık lahm-ı ganem iştirâsını ikrâr mâ‘adâ altı guruş on altı parayı inkârından gayrı meblağ-ı mezbûr sekiz guruş yirmi dört paranın dört guruşunu müdde‘î-i mezbûrun emriyle hizmetkârı gāib ani’l-meclis diğer Mehmed b. Ali nâm kimesneye def‘ ü teslîm edip zimmetimde ancak dört guruş yirmi dört para deynim bâkī kalmışdır deyü eylediği def‘ini mezbûr Mehmed ve ziyâde müdde‘âsını müdde‘î-i mersûm Ali Beşe beyândan âciz olup her biri âharı istihlâf eyledikde her biri ba‘de’t-tahlîfi’ş-şer‘î mûcebince meblağ-ı mezbûr sekiz guruş yirmi dört parayı müdde‘î-i mezbûr Ali Beşe’ye edâ ve teslîme mezbûr Mehmed’e ba’de’t-tenbîh müdde‘î-i mezbûr Ali Beşe ziyâde müdde‘âsı olan altı guruş on altı para mutâlebesiyle mezbûr Mehmed’e bilâ-beyyine bî-vech mu‘ârazadan men‘ olunduğu bi’l-iltimâs. Fî 22 Ra sene 1197