Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 554 Hüküm no: 691 Orijinal metin no: [92a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah’ın para ve bazı eşyalarını çaldığı iddiasıyla Selime bt. Abdullah aleyhine açtığı davaya sulh bedeli karşılığı son verildiği Mahrûse-i Galata’ya muzâfe Tophâne kasabası mahallâtından Kız Mehmed mahallesinde sâkine ve zâtı mu‘arrefe olan Âişe bt. Abdullah nâm hatun Mumcu Abdullah Beşe mübâşeretiyle Davudpaşa Mahkemesi’nde meclis-i şer‘de ihzâr etdirdiği kezâlik zatı mu‘arrefe olan Arab Selime bt. Abdullah nâm hatun mahzarında yedimde mâlım olan nakid doksan guruş ile mecmû‘u yüz on guruş kıymetli kırk dirhem bir çift sîm bilezik ve beş zarf ma‘a fincan ve dört işleme pesend yağlık ve bir işleme havlu ve yedi işleme iş makramesi ve biri çiçekli ve biri şalî cedîd iki entari ve altı sahan-ı kebîr ma‘a kapağımı mezbûr Selime Hatun târih-i i‘lâmdan yedi ay mukaddem Sultan Bâyezid mahallesinde vâki‘ menzilde mekân-ı muhrezimden bi-gayrı hakkın hufyeten ahz ü kabz etmekle meblağ-ı mezbûr doksan guruşu ve eşyâ-i muharrere-i mezkûrenin a‘yânı yedinde mevcûd ise a‘yânını müstehleke ise kıymet-i mezkûreleri olan meblağ-ı mezbûr yüz on guruşu mezbûre Selime Hatun’dan hâlâ taleb ederim deyü da‘vâ etdikde ol dahi bi’l-külliye inkâr edip bu cihetle beynlerinde ba‘de vukū‘ı’l-münâza‘a bâ-vesâtet-i muslihîn müdde‘iye-i mezbûre Âişe Hatun ber-vech-i muharrer tesaddî eylediği da‘vâ-yı mezkûresinden mezbûre Selime Hatun ile an-inkâr nakid yetmiş guruş ve üç işleme iş makramesi üzerine inşâ-i akd-i sulh olup meblağ-ı mezbûr doksan guruşa ve eşyâ-i muharrere-i mezbûre ve kıymet-i mezkûrelerine müte‘allika âmme-i da‘vâdan ve <> mezbûre Selime Hatun’un zimmetini ibrâ ve ıskāt eyledikde ol dahi sulh ve ibrâsını kabûl bedel-i sulh olan meblağ-ı mezbûr yetmiş guruşu mezbûre Âişe Hatun’a edâ ve teslîme mezbûre Selime Hatun’a tenbîh olunduğu ba‘de’t-tescîl bi’l-iltimâs. Fî 29 min-şehri Rebî‘ülevvel sene 1197