Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 561 Hüküm no: 706 Orijinal metin no: [93a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçador v. Danil’in Artin v. Serkiz’den aldığı borcu ve faizini ödediği ancak faizi Haçador’un geri vermesi gerektiği İşbu bâ‘isü’l-i‘lâm Haçador v. Danil nâm zimmî Davudpaşa Mahkemesi’nde meclis-i şer‘de Artin v. Serkiz nâm zimmî muvâcehesinde târih-i i‘lâmdan dört buçuk sene mukaddem merkūm Artin zimmî yedinden istidâne ve kabz eylediğim cihet-i karzdan yüz guruş deynim içün sinîn-i mezkûrede merkūm Artin zimmîye bilâ-devr mahz ribâ olmak üzere altmış yedi buçuk guruş verip lâkin ben deyn-i meblağ-ı mezbûr yüz guruşu merkūm Artin zimmîye tamamen edâ ve teslîm etmemle murâbaha olmak üzere medfû‘um olan meblağ-ı mezbûr altmış yedi buçuk guruşu merkūm Artin zimmîden hâlen istirdâd ederim deyü ba‘de’d-da‘vâ ve’l-istintâk ve’l-ikrâr alâ-mûcebi ikrârihî meblağ-ı mezbûr altmış yedi buçuk guruşu müdde‘î-i mesfûr Haçador zimmîye red ve teslîme merkūm Artin zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî 26 R sene 1197