Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 564 Hüküm no: 713 Orijinal metin no: [93b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Mahmud’un, karısı Meryem’in din ve imanına küfretmesi sebebiyle boşanmış olduklarından mehrinin ödenmesi İslâmbol’da Koruk Mahmud mahallesinde sâkine ve zâtı mu‘arrefe Meryem bt. Mahmud nâm hatun Davudpaşa Mahkemesi’nde meclis-i şer‘de zevc-i mutallıkı İbrahim b. Mahmud nâm kimesne mahzarında mezbûr İbrahim zevc-i dâhilim olduğu hâlde târih-i i‘lâmdan altı gün mukaddem mahalle-i mezbûrede sâkin olduğumuz menzilde benim dîn ve îmânıma sebb edip ondan nâşi mezbûr İbrahim’den mübâne olmamla zimmetinde ma‘kūdun-aleyh olan otuz üç guruş mehr-i müeccelim ile nafaka-i iddet-i mu‘ayyene ve meûnet-i süknâmı zevc-i mutallıkım mezbûrdan hâlâ taleb ederim deyü ba‘de’d-da‘vâ ve’l-istintâk mezbûr İbrahim dahi cevâbında müdde‘iye-i mezbûre ancak yirmi beş guruş mehr-i müeccelim ile zevce-i medhûlün-bihâsı olduğunu ikrâr mâ‘adâyı ba‘de’l-inkâr müdde‘iye-i mezbûre ber-vech-i muharrer ziyâde sekiz guruş müdde‘âsını beyâna havâle ve sebb müdde‘âsını beyândan âcize ve talebiyle mezbûr İbrahim’e yemîn teklif olundukda ol dahi yemînden nükûl etmeğin mûcebiyle müdde‘iye-i mezbûre zevci mezbûrdan mübâne ve mezbûr İbrahim’e tecdîd-i îmân lâzım gelmeğin mezbûr İbrahim’e telkīn-i îmân olundukdan sonra mertebe-i ikrârı olan mehr-i mezkûr yirmi beş guruşu müdde‘iye-i mezbûre Meryem Hatun’a edâ ve teslîme mezbûr İbrahim’e ba‘de’t-tenbîh müdde‘iye-i mezbûre Meryem Hatun’u ber-vech-i muharrer nafaka-i iddet ve meûnet-i süknâsı içün zevc-i mutallıkı mezbûr İbrahim ile beş guruş üzerine terâzî olunduğu bi’l-iltimâs huzûr-ı âlîlerine i‘lâm olundu. Fî 6 Ca sene 1197