Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 565 Hüküm no: 715 Orijinal metin no: [93b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Beşe’nin Ahmed Beşe’ye olan borcunu ödemesi Ahmed Beşe’nin de boş arsayı Halil Beşe’ye iâde etmesi Bâ‘isü’l-i‘lâm Ahmed Beşe b. Yusuf nâm kimesne Davudpaşa Mahkemesi’nde meclis-i şer‘de Halil Beşe b. Yakub nâm kimesne mahzarında bin yüz doksan iki senesi Muharremi’l-harâm’ının altıncı günü mezbûr Halil Beşe yedimden iştirâ ve kabz eylediği yüz guruş deyni mukābelesinde mezbûr Halil Beşe’nin vâlidesi Fatıma nâm hatunun bi’l-icâreteyn taht-ı tasarrufunda olup mahmiye-i İslâmbol’da Arabacı Bâyezid mahallesinde kâin Hüseyin Çavuş nâm sâhibü’l-hayrın mescid-i şerîfinde imâm ve müezzin olanlara meşrûta yine mahalle-i mezbûrede vâki‘ ma‘lûmü’l-hudûd ve’l-müştemilât bir bâb vakıf menzilini mezbûre Fatıma Hatun târih-i mezbûrda bana vefâen ferâğ eyledikden sonra mezbûre Fatıma Hatun fevt ve menzil-i mezkûr oğlu mezbûr Halil Beşe’ye intikāl edip lâkin menzil-i mezkûr bundan akdem vukū‘ bulan harîk-i kebîrde muhterik olup arsa sırfa kalmağla mezbûr Halil Beşe deyn-i meblağ-ı mezbûr yüz guruşu bana edâ ve arsa-i mezkûreyi yedimden ahza mezbûr Halil Beşe’ye tenbîh olunmak matlûbumdur deyü ba‘de’d-da‘vâ ve’l-istintâk ve’l-ikrâr alâ-mûcebi ikrârihî deyn-i meblağ-ı mezbûr yüz guruşu müdde‘î-i mezbûr Ahmed Beşe’ye edâ ve teslîme mezbûr Halil Beşe’ye ve arsa-i mezkûreyi geri fekk ve teslîme müdde‘î-i mezbûr Ahmed Beşe’den her birine tenbîh olunduğu bi’l-iltimâs huzûr-ı âlîlerine i‘lâm olundu. Fî 11 Ca sene 1197