Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 565 Hüküm no: 716 Orijinal metin no: [93b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Halil’in kira ile oturduğu evin kirasını kefili olan kocası Ali’nin vakıf mütevellisine ödemesi İslâmbol’da Uzun Yusuf mahallesinde sâkin ve mahalle-i mezbûre avârızı vakfının mütevellîsi es-Seyyid el-Hâc Zeynelabidin Efendi b. eş-Şeyh es-Seyyid Halil Davudpaşa Mahkemesi’nde meclis-i şer‘de Ali b. Abdullah nâm kimesne mahzarında vakf-ı mezbûr müsakkafâtından olup mahalle-i mezbûrede vâki‘ ma‘lûmü’l-hudûd bir bâb vakıf menzil mezbûr Ali’nin hâlâ zevcesi gāibe ani’l-meclis Emine bt. Halil nâm hatunun bi’l-icâreteyn taht-ı tasarrufunda olmağla menzil-i mezkûr icâresinden mezbûre Emine Hatun zimmetinde müctemi‘ bâ-i‘lâm-ı şer‘î mahkûmün-bih otuz altı guruşun edâsına tarafeynden emr ve kabûlü hâvî kefâlet-i sahîha ile mezbûr Ali kefîl ve zâmin olmağla meblağ-ı mezbûr otuz altı guruşu mezbûr Ali’nin kefâletine binâen hâlâ taleb ederim deyü ba‘de’d-da‘vâ ve’s-suâl ve’l-inkâr müdde‘î-i mezbûr es-Seyyid el-Hâc Zeynelabidin Efendi ber-vech-i muharrer müdde‘âsını şühûd-ı udûlden Numan Efendi b. Süleyman ve Salih b. Halil şehâdetleriyle bi’l-muvâcehe vech-i şer‘î üzere isbât etmeğin mûcebince meblağ-ı mezbûr otuz altı guruşu bi-hükmi’l-kefâle müdde‘î-i mezbûr es-Seyyid el-Hâc Zeynelabidin Efendi’ye edâ ve teslîme mezbûr Ali’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 11 Ca sene 1197