Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 568 Hüküm no: 720 Orijinal metin no: [94a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Ahmed’den boşanmış olan Hanife bt. Hüseyin’in fazladan istediği on guruş mehrini ispatlayamadığı İslâmbol’da İskender Ağa mahallesinde sâkine ve zâtı mu‘arrefe Hanife bt. Hüseyin nâm hatun Davudpaşa Mahkemesi’nde meclis-i şer‘de zevc-i muhâlı‘ı Mustafa b. Ahmed nâm kimesne mahzarında mezbûr Mustafa üç def‘a akidde müsemmâ kırk beş guruş mehr-i müeccel tesmiyesiyle zevc-i dâhilim olduğu hâlde beynimizde hüsn-i imtizâcımız olmayıp ben hul‘a tâlibe olduğum ecilden mezbûr Mustafa’nın zimmetinde ma‘kūdun-aleyh olan mehr-i mezkûr kırk beş guruşun otuz beş guruşu ile nafaka-i iddet-i mu‘ayyenem üzerlerine ve meûnet-i süknâm dahi kendi üzerime [olmak] üzere mezbûr Mustafa ile târih-i i‘lâmdan sekiz ay mukaddem muhâla‘a-i sahîha-i şer‘iye ile hul‘ olduğumda ol dahi hul‘-ı mezbûru kabûl etmekle mehr-i mezkûrun bâkīsi olan on guruşu zevc-i muhâlı‘ım mezbûrdan hâlâ taleb ederim deyü ba‘de’d-da‘vâ ve’l-istintâk mezbûr Mustafa dahi cevâbında müdde‘iye-i mezbûre Hanife Hatun ancak iki def‘a müsemmâ otuz beş guruş mehr-i müeccel ile zevce-i medhûlün-bihâsı olduğu hâlde târih-i mezbûrda muhâla‘a olduğunu ikrâr ziyâde on guruş mehir ile bir def‘a akdi bi’l-külliye inkâr etmeğin müdde‘iye-i mezbûre Hanife Hatun ber-vech-i muharrer müdde‘âsını beyândan âcize ve talebiyle mezbûr Mustafa ba‘de’t-tahlîfi’ş-şer‘î mûcebince müdde‘iye-i mezbûre Hanife Hatun ziyâde bir def‘a akidde müsemmâ on guruş mehir mutâlebesiyle zevc-i muhâlı‘ı mezbûr Mustafa’ya bilâ-beyyine bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 16 min-Ca sene 1197