Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 569 Hüküm no: 722 Orijinal metin no: [94a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeliha bt. Abdullah’ın Osman b. Abdullah ve Âbide bt. Abdullah’a olan borcu konusunda sulh bedeli karşılığı anlaştıkları İslâmbol’da Veled-i Karabaş mahallesinde sâkinler Osman b. Abdullah ve mu‘arrefetü’z-zât Âbide bt. Ahmed nâm zevcân Davudpaşa Mahkemesi’nde meclis-i şer‘de Zeliha bt. Abdullah nâm hatunun zevci ve tarafından vech-i âtî üzere sâbitü’l-vekâle vekîli Abdülcelil Ağa b. el-Hâc Abdülbâki nâm kimesne mahzarında bundan akdem müvekkile-i mezbûre Zeliha Hatun zimmetinde cihet-i karzdan otuz sekiz guruş alacak hakkımız olmağla hâlâ taleb ederiz deyü tesaddî eyledikleri da‘vâlarından bâ-vesâtet-i muslihîn vekîl-i mezbûr Abdülcelil Ağa ile yirmi guruş üzerine sulh olup mâ‘adâ on sekiz guruşa müte‘allika da‘vâdan müvekkile-i mezbûre Zeliha Hatun’un zimmetini ibrâ ve ıskāt eylediklerinde vekîl-i mezbûr Abdülcelil Ağa dahi sulh ve ibrâlarını kabûl etmeğin mûcebince bedel-i sulh-ı mezkûr yirmi guruşu zevcân-ı müdde‘iyân-ı mezbûrân Osman ve Âbide Hatun’a müvekkile-i mezbûre Zeliha Hatun edâ ve teslîm etmek üzere vekîl-i mezbûre Abdülcelil Ağa’ya tenbîh olunduğu bi’l-iltimâs huzûr-ı âlîlerine i‘lâm olundu. Fî 19 min-Ca sene 1197