Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 570 Hüküm no: 724 Orijinal metin no: [94b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Ali’den boşanmış olan Ahmed Beşe’nin mehri ödemesi İslâmbol’da Tarsus mahallesinde sâkine Fatıma bt. Ali nâm hatunun vâlidesi ve tarafından sâbitü’l-vekâle vekîli olan zâtı mu‘arrefe Hadice bt. Ahmed nâm hatun Davudpaşa Mahkemesi’nde meclis-i şer‘de dâmâdı Ahmed Beşe b. Ahmed nâm kimesne mahzarında kızım müvekkilem mezbûre Fatıma Hatun dâmâdım mezbûr Ahmed Beşe’nin üç def‘a akidde müsemmâ kırk iki buçuk guruş mehr-i müeccel tesmiyesiyle zevce-i medhûlün-bihâsı olduğu hâlde târih-i i‘lâmdan dokuz ay mukaddem kızım müvekkilem mezbûreyi tatlîk etmekle zimmetinde ma‘kūdun-aleyh olan mehr-i mezkûr kırk iki buçuk guruşu mezbûr Ahmed Beşe’den bi’l-vekâle taleb ederim deyü ba‘de’d-da‘vâ ve’l-istintâk mezbûre Ahmed Beşe dahi cevâbında müvekkile-i mezbûre Fatıma Hatun ancak iki def‘a akidde mehr-i mezkûr kırk iki buçuk guruş ile zevcesi olduğunu ve târih-i mezbûrda tatlîkini ikrâr mâ‘adâ bir def‘a akdi bi’l-külliye inkâr etmeğin müdde‘iye-i vekîl-i mezbûre Hadice Hatun ber-vech-i muharrer ziyâde bir def‘a akid müdde‘âsını beyândan âcize ve talebiyle mezbûr Ahmed Beşe ba‘te’t-tahlîfi’ş-şer‘î mûcebince müdde‘iye-i vekîl-i mezbûre Hadice Hatun ziyâde bir def‘a akid mutâlebesiyle mezbûr Ahmed Beşe’ye bilâ-beyyine bî-vech mu‘ârazadan ba‘de’l-men‘ mehr-i mezkûr kırk iki buçuk guruşu zevce-i müvekkile-i mezbûre Fatıma Hatun’a edâ ve teslîme mezbûr Ahmed Beşe’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 22 Ca sene 1197