Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 576 Hüküm no: 740 Orijinal metin no: [95b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Denizabdal mahallesinde Mustafa Reşid’in evinde kiracı olarak oturan Mahmud b. Osman’ın kirasını ödemesi İslâmbol’da Deniz Abdal mahallesinde sâkin es-Seyyid Mustafa Reşid b. Ahmed nâm kimesne Davudpaşa Mahkemesi’nde meclis-i şer‘de Mahmud b. Osman nâm kimesne mahzarında mahalle-i mezbûrede vâki‘ taht-ı tasarrufumda olan bir bâb vakıf menzilimi işbu târih-i i‘lâm senesi Rebî‘ülâhırı gurresinden beher şehr beş guruş ücret tesmiyesiyle mezbûr Mahmud’a îcâr ve teslîm eyledikde ol dahi ba‘de’l-istîcâr ve’t-tesellüm şehr-i merkūm gurresinden târih-i i‘lâm şehri gurresine gelince mezbûr Mahmud zimmetinde terâküm eden on guruşu hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr es-Seyyid Mustafa Reşid ber-vech-i muharrer müdde‘âsını lede’t-tezkiye adâletleri zâhir olan Molla Ahmed b. Hafız Mehmed ve Ahmed Beşe b. Salih nâm kimesneler şehâdetleriyle bi’l-muvâcehe vech-i şer‘î üzere isbât etmeğin mûcebince meblağ-ı mezbûr on guruşu müdde‘î-i mezbûr es-Seyyid Mustafa Reşid’e edâ ve teslîme mezbûr Mahmud’a tenbîh olunduğu bi’l-iltimâs huzûr-ı âlîlerine i‘lâm olundu. Fî ( ) min-C sene 1197