Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 576 Hüküm no: 739 Orijinal metin no: [95a-8] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. Hüseyin ile Şerife Zeliha Hatun arasındaki yanmış olan vakıf menzil enkazı satışı davası Bâ‘isü’l-i‘lâm el-Hâc Osman b. Hüseyin nâm kimesne Davudpaşa Mahkemesi’nde meclis-i şer‘de mu‘arrefetü’z-zât Şerife Zeliha Hatun bt. es-Seyyid Osman mahzarında mezbûre Şerife Zeliha Hatun İslâmbol’da Müneccim Sa‘di mahallesinde vâki‘ bi’l-icâreteyn taht-ı tasarrufunda olan ma‘lûmü’l-hudûd bir bâb vakıf menzilinin münhedim olan mevâzi‘inden ma‘lûmü’l-mikdâr enkāzını bundan akdem seksen guruş semen-i medfû‘ ve makbûza bana bey‘ ve teslîm ve ben dahi ba‘de’l-iştirâ ve’t-tesellüm ve’l-kabûl zikr olunan enkāzı vakf-ı mezbûrun mütevellîsi gāib ani’l-meclis Hüseyin Şevki nâm kimesne benden da‘vâ ve bâ-vesâtet-i muslihîn benimle seksen guruşa sulh ve bedel-i sulh olan meblağ-ı mezbûr seksen guruşu bâ-i‘lâm-ı şer‘î benden ahz etmekle ben dahi ber-vech-i muharrer medfû‘um olan seksen guruşun otuz beş guruşunu mezbûre Şerife Zeliha Hatun yedinden ahz ü kabz ve kırk beş guruşu zimmetinde bâkī kalmağla meblağ-ı bâkī-i mezbûr kırk beş guruşu istirdâd ederim deyü ba‘de’d-da‘vâ ve’l-istintâk mezbûre Şerife Zeliha Hatun dahi kaziyye vech-i muharrer üzere olduğunu ikrâr lâkin müdde‘î-i mezbûr el-Hâc Osman kabzını mu‘terif olduğu meblağ-ı mezbûr otuz beş guruşa benimle sulh olup mâ‘adâ kırk beş guruşa ve bi’l-cümle husûs-ı mezkûra müte‘allika âmme-i de‘âvîden benim zimmetimi ibrâ ve ıskāt ve ben dahi ibrâsını kabûl etmiş idim deyü ba‘de’d-da‘vâ ve’l-inkâr mezbûre Şerife Zeliha Hatun [95b] def‘-i mezkûrunu lede’t-tezkiye adâletleri zâhir olan şühûd-ı udûlden Kahveci el-Hâc Mustafa b. Halil ve Hüseyin b. Süleyman nâm kimesneler şehâdetleriyle vech-i şer‘î üzere bi’l-muvâcehe isbât etmeğin mûcebince müdde‘î el-Hâc Osman meblağ-ı bâkī-i mezbûr kırk beş guruş mutâlebesiyle mezbûre Şerife Zeliha Hatun’a bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 4 C sene 1197