Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 577 Hüküm no: 742 Orijinal metin no: [95b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Hüseyin’in vefat eden Hasan b. Abdullah’a olan borcunu vârislerine ödemesi İslâmbol’da Koca Mustafa Paşa mahallesinde sâkin iken bundan akdem vefât eden Hasan b. Abdullah’ın verâseti zevce-i menkûha-i metrûkesi Âişe bt. Abdullah nâm hatun ile sulbî kebîr oğlu Hafız Hüseyin nâm kimesneye münhasıra ve terekesinin sümünü zevcesi mezbûre Âişe Hatun’a ve seb‘a-i esmânı oğlu mezbûr Hafız Hüseyin’e isâbeti tahakkukundan sonra mezbûrân Hafız Hüseyin ile zâtı mu‘arrefe olan Âişe Hatun Davudpaşa Mahkemesi’nde meclis-i şer‘de es-Seyyid Hasan b. Hüseyin nâm kimesne mahzarında mûrisimiz müteveffâ-yı mezbûr Hasan’ın mezbûr es-Seyyid Hasan zimmetinde cihet-i karzdan on guruş alacak hakkı olup meblağ-ı mezbûru kable’l-ahz ve’l-istifâ mezbûr Hasan fevt ve meblağ-ı mezbûr bize mevrûs olmağla biz meblağ-ı mezbûr on guruşu mezbûr es-Seyyid Hasan’dan hâlâ taleb ederiz deyü ba‘de’d-da‘vâ ve’l-istintâk ve’l-inkâr müdde‘iyân-ı mezbûrân Hafız Hüseyin ve Âişe Hatun ber-vech-i muharrer müdde‘âlarını şühûd-ı udûlden Mehmed Emin b. Mehmed ve Ahmed b. el-Hâc Osman nâm kimesneler şehâdetleriyle vech-i şer‘î üzere bi’l-muvâcehe isbât etmeğin mûcebince meblağ-ı mezbûr on guruşu müdde‘iyân-ı mezbûrân Hafız Hüseyin ve Âişe Hatun’a edâ ve teslîme mezbûr es-Seyyid Hasan’a tenbîh olunduğu bi’l-iltimâs huzûr-ı âlîlerine i‘lâm olundu. Fî 6 min-C sene 1197