Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 578 Hüküm no: 743 Orijinal metin no: [95b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sancakdar Hayreddin mahallesinde ölen Maroki v. Haçador’un vârisleri Kigork ve Mıgırdıç kardeşler arasındaki miras davasına sulh bedeli karşılığı son verildiği İslâmbol’da Sancakdâr Hayreddin mahallesinde mütemekkin iken bundan akdem hâlik olan Maroki v. Haçador zimmînin verâseti li-ebeveyn er karındaşları Kigork ve Mıgırdıç nâm zimmîlere münhasıra ve terekesi bi’l-münâsafe merkūmâna isâbeti tahakkukundan sonra merkūm Mıgırdıç zimmî Davudpaşa Mahkemesi’nde meclis-i şer‘de karındaşı Kigork zimmî muvâcehesinde karındaşım hâlik-i merkūmun terekesinden kırk guruşunu karındaşım merkūm Kigork zimmî ketm ve ihfâ etmekle meblağ-ı mezbûr kırk guruşdan benim nısf hisseme isâbet eden yirmi guruşunu karındaşım merkūm kigork zimmîden hâlâ taleb ederim deyü tesaddî eylediği da‘vâsından bâ-vesâtet-i muslihîn karındaşı merkūm Kigork zimmî ile an-inkâr iki guruş bedel-i makbûza sulh olup mâ‘adâ on sekiz guruşa ve hukūk-ı mîrâsa müte‘allika âmme-i da‘vâdan karındaşı merkūm Kigork zimmînin zimmetini ibrâ ve ıskāt eylediğinde ol dahi sulh ve ibrâsını kabûl eylediği ba‘de’t-tescîl bi’l-iltimâs huzûr-ı âlîlerine i‘lâm olundu. Fî 7 C sene 1197