Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 581 Hüküm no: 752 Orijinal metin no: [96a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Annesi ölmüş olan küçük torunu Nefise’ye bakan Ayşe bt. Ali’ye damadının nafakayı ödemesi İslâmbol’da İbrahim Çavuş mahallesinde sâkine ve zâtı mu‘arrefe Âişe bt. Ali nâm hatun Davudpaşa Mahkemesi’nde meclis-i şer‘de sâbıkā dâmâdı Ali Beşe b. Süleyman nâm kimesne mahzarında mezbûr Ali Beşe’nin firâşından hâsıla ve kızım müteveffiye Fatıma bt. İsmail’den mütevellide hâlâ bi-hakkı’l-hıdâne hacr u terbiyemde olan işbu Nefise nâm sagīrenin bâ-hüccet-i şer‘iye yevmî dörder para nafaka-i mukaddere-i mefrûzasından bin yüz doksan altı senesi Zilka‘detü’ş-şerîfesi gurresinden târih-i i‘lâma gelince dâmâdım mezbûr Ali Beşe zimmetinde yedi ay on beş günde terâküm eden yirmi iki buçuk guruşun beş guruşunu yedinden ahz ü kabz edip on yedi buçuk guruşu zimmetinde bâkī kalmağla hâlâ taleb ederim deyü ba‘de’d-da‘vâ ve’l-istintâk ve’l-ikrâr alâ-mûcebi ikrârihî meblağ-ı bâkī-i mezbûr on yedi buçuk guruşu müdde‘iye-i mezbûre Âişe Hatun’a edâ ve teslîme mezbûr Ali Beşe’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 15 min-C sene 1197