Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 582 Hüküm no: 755 Orijinal metin no: [96a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Duvarcı Esteryo ile arsa duvarlarını yaptırdığı Ahmed Ağa arasındaki alacak davası Duvarcı tâifesinden Esteryo v. Şomo nâm zimmî Davudpaşa Mahkemesi’nde meclis-i şer‘de Dergâh-ı âlî yeniçerilerinin ikinci bölük çorbacısı es-Seyyid Ahmed Ağa b. Abdurrahman mahzarında bundan akdem mûmâ-ileyh es-Seyyid Ahmed Ağa’nın bi-şarti’r-rücû‘ emriyle mahmiye-i İslâmbol’da Sancakdâr Hayreddin mahallesinde kâin bir bâb muhterik menzili arsasının etrâf duvarlarını ma‘lûmü’l-esâmî duvarcılara beher yevm birer guruş ve ma‘lûmü’l-esâmî rençberlere beher yevm on beşer para ücret ile yaptırdıp ücret-i müsemmâ-yı mezkûreden terâküm eden yüz altmış yedi buçuk guruşu ben zikr olunan duvarcı ve rençberlere tamamen edâ ve teslîm eylediğimden sonra meblağ-ı mezbûrun yetmiş yedi buçuk guruşunu mûmâ-ileyh es-Seyyid Ahmed Ağa yedinden ahz ü kabz edip doksan guruş zimmetinde bâkī kalmağla meblağ-ı mezbûr doksan guruşu mûmâ-ileyh Ahmed Ağa’dan bi’l-mürâca‘a hâlâ taleb ederim deyü da‘vâ etdikde ol dahi cevâbında fi’l-vâki‘ müdde‘î-i mesfûra emr-i mezkûrunu ikrâr lâkin zikr olunan duvarcıların ücret-i yevmiyeleri yirmi beş ve rençberlerin on ikişer paradan müdde‘î-i mesfûrun kabzını mu‘terif olduğu meblağ-ı mezbûr yetmiş yedi buçuk guruşa bâliğ olduğunu ikrâr mâ‘adâyı bi’l-külliye inkârından gayrı müdde‘î-i mesfûr Esteryo zimmî kabzını i‘tirâf eylediği meblağ-ı mezbûr yetmiş yedi buçuk guruşdan mâ‘adâ müdde‘î-i mesfûrun emriyle gāib ani’l-beled Duvarcı Karaoğlan nâm zimmîye yirmi dokuz guruş ve kendüye on yedi guruş otuz beş para ki cem‘an kırk altı guruş otuz beş parayı müdde‘î-i mesfûr Esteryo zimmîden istirdâd ederim deyü eylediği ziyâde kırk altı guruş otuz beş para müdde‘âsını müdde‘î-i mesfûr Esteryo zimmî dahi inkâr etmeğin evvelâ müdde‘î-i mesfûr Esteryo zimmî ber-vech-i muharrer müdde‘âsını beyândan âciz ve tahlîfe dahi tâlib olmamağla müdde‘î-i mesfûr Esteryo zimmî meblağ-ı bâkī-i mezbûr doksan guruş mutâlebesiyle mûmâ-ileyh es-Seyyid Ahmed Ağa’ya bilâ-beyyine bî-vech mu‘ârazadan ba‘de’l-men‘ mûmâ-ileyh es-Seyyid Ahmed Ağa dahi ziyâde kırk altı guruş otuz beş para müdde‘âsını beyâna havâle olunduğu mübâşirleri yazıcı miyândan Mustafa Efendi kulları iltimâsıyla huzûr-ı âlîlerine i‘lâm olundu. Fî 17 min-S sene 1197