Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 583 Hüküm no: 756 Orijinal metin no: [96a-8] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskohi bt. Norsis’in vefat etmiş olan Fatma bt. Abdullah’a olan borcunu vârisine ödemesi İslâmbol’da Kasab İlyas mahallesinde sâkine iken bundan akdem fevt olan Fatıma bt. Abdullah nâm hatunun li-ebeveyn er karındaşı oğlunun oğlu ve hasran vârisi Ahmed Beşe b. Mehmed nâm kimesne Davudpaşa Mahkemesi’nde meclis-i şer‘de mu‘arrefetü’ş-şahs İskohi bt. Norsis nâm Nasrâniye muvâcehesinde mûrisem müteveffât-ı mezbûre Fatıma Hatun’un mersûme İsko[hi] Nasrâniye zimmetinde mukaddemâ hayatında yedinden istidâne ve kabz eylediği cihet-i karzdan bâ-temessük elli guruş alacak hakkı olmağla meblağ-ı mezbûru kable’l-ahz ve’l-istifâ mûrisem mezbûre Fatıma fevt ve meblağ-ı mezbûr ancak bana mevrûs olmağla meblağ-ı mezbûr elli guruşun on guruşu mutâlebesinden mersûme İskohi Nasrâniyenin zimmetini ibrâ ve ıskāt etmemle mâ‘adâsı olan kırk guruşu mersûme İskohi Nasrâniyeden hâlâ taleb ederim deyü ba‘de’d-da‘vâ ve’l-istintâk ve’l-ikrâr alâ-mûcebi ikrârihâ meblağ-ı bâkī-i mezbûr kırk guruşun edâsıyla mersûme İskohi Nasrâniye ilzâm olunduğu bi’l-iltimâs huzûr-ı âlîlerine i‘lâm olundu. Fî 17 min-C sene 1197