Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 584 Hüküm no: 760 Orijinal metin no: [96b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanes v. Artin’in doğramacı dükkânına ait birikmiş kira ücretini Halil b. Hızır’a ödemesi Bâ‘isü’l-i‘lâm el-Hâc Halil b. Hızır nâm kimesne Davudpaşa Mahkemesi’nde meclis-i şer‘de Avanes v. Artin nâm zimmî muvâcehesinde bundan akdem merkūm Avanes zimmî İslâmbol’da Molla Gürânî Vakfı’ndan bi’l-icâreteyn taht-ı tasarrufumda olan mârrü’z-zikr Molla Gürânî mahallesinde vâki‘ ma‘lûmü’l-hudûd bir bâb doğramacı dükkânında beher şehr doksan beşer para ücret tesmiye[si ile] müstecirim olmağla dükkân-ı mezkûr icâresinden bin yüz doksan dört senesi Zilhiccesi gurresinden doksan altı senesi Cemâziyelevveli gāyetine gelince on sekiz ayda merkūm Avanes zimmî zimmetinde terâküm eden kırk iki guruş otuz paradan bâkī yirmi buçuk guruş alacak hakkım olmağla hâlâ taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı bâkī-i mezbûr yirmi buçuk guruşun edâsıyla merkūm Avanes zimmî ilzâm olunduğu bi’l-iltimâs huzûr-ı âlîlerine i‘lâm olundu. Fî 20 min-C sene 1197