Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 585 Hüküm no: 762 Orijinal metin no: [96b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. İbrahim’in Dimitri v. Abraham’a yoğurt ücretinden olan borcunu ödemesi Yoğurtcu tâifesinden Dimitri v. Abraham nâm zimmî Davudpaşa Mahkemesi’nde meclis-i şer‘de es-Seyyid Mustafa b. İbrahim nâm kimesne mahzarında mezbûr es-Seyyid Mustafa zimmetinde mukaddemâ yedimden iştirâ ve kabz eylediği vezn ve fiyâtı beynimizde ma‘lûm yoğurt semeninden bâkī yirmi bir buçuk guruş alacak hakkım olmağla hâlâ taleb ederim deyü ba‘de’d-da‘vâ ve’l-istintâk ol dahi cevâbında kaziyye vech-i muharrer üzere olduğunu ikrâr lâkin meblağ-ı mezbûr yirmi bir buçuk guruşun dokuz guruş otuz parasını kendüye edâ ve teslîm edip zimmetimde ancak on bir guruş otuz para deynim bâkī kalmışdır deyü ba‘de’d-def‘ ve’l-inkâr mezbûr es-Seyyid Mustafa def‘-i meşrûhunu beyândan âciz ve talebiyle müdde‘î-i merkūm Dimitri zimmîye yemîn teklif olundukda ol dahi yemînden nükûl etmeğin mûcebince müdde‘î-i mezbûr Dimitri zimmî meblağ-ı mezbûr dokuz guruş otuz para mutâlebesiyle mezbûr es-Seyyid Mustafa’ya bî-vech mu‘ârazadan ba‘de’l-men‘ mertebe-i ikrârı olan meblağ-ı mezbûr on bir guruş otuz paranın edâsıyla mezbûr es-Seyyid Mustafa ilzâm olunduğu bi’l-iltimâs huzûr-ı âlîlerine i‘lâm olundu. Fî 22 min-C sene 1197