Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 586 Hüküm no: 764 Orijinal metin no: [96b-8] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beno v. Miso’nun Hıristo v. Tereyani’ye olan borcunu ödemesi Bâ‘isü’l-i‘lâm Hıristo v. Terayani nâm zimmî Davudpaşa Mahkemesi’nde meclis-i şer‘de Beno v. Miso nâm zimmî muvâcehesinde benim gāibe ani’l-meclis Meyrem nâm Nasrâniye zimmetinde cihet-i deyn-i şer‘îden elli iki buçuk guruş alacak hakkım olup ve mersûme Meyrem Nasrâniyenin dahi mesfûr Beno zimmî zimmetinde kezâlik cihet-i deyn-i şer‘îden elli iki buçuk guruş alacak hakkı olmağla üçümüz bir meclisde olduğumuz hâlde gāibe-i mersûme Meyrem Nasrâniyeden meblağ-ı mezbûr elli iki buçuk guruş ile beni mesfûr Beno zimmî üzerine havâle-i sahîha-i şer‘iye ile havâle ve her birimiz havâle-i mezkûreyi kabûl etmeğin ben meblağ-ı mezbûr elli iki buçuk guruşu mesfûr Beno zimmîden hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm Hıristo zimmî ber-vech-i muharrer müdde‘âsını lede’t-tezkiye şehâdetleri makbûle Todori v. Hıristo ve Dik Todori v. Kosto nâm zimmîler şehâdetleriyle bi’l-muvâcehe vech-i şer‘î üzere isbât etmeğin mûcebince meblağ-ı mezbûr elli iki buçuk guruşu müdde‘î-i merkūm Hıristo zimmîye edâ ve teslîme merkūm Beno zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî 24 min-C sene 1197