Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 65 Hüküm no: 3 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Efendi b. Bayezid’in oturduğu Haremeyn Evkafı’na ait evde yaptığı tadilatın keşfi Atebe-i aliyye-i sultâniyyede kapıcılar kâtibi olan fahrü’l-a‘yân Hüseyin Efendi’nin sâkin oldukları evlerinin hüccetidir. Tahrîren fi’l-yevmi’s-sânî ve’l-ışrîn min-şehri Zilka‘deti’ş-şerîfe min-şühûri sene sitte aşere ve elf. Atebe-i aliyye-i sultâniyyede bi’l-fi‘il kapıcılar kâtibi olan fahrü’l-emâcid ve’l-ekârim zahrü’l-e‘âzim ve’l-efâhim umdetü erbâbi’t-tahrîr ve’r-rakam zübdetü ashâbi’t-tahrîr ve’l-kalem el-muhtassu bi-mezîdi inâyeti’l-meliki’l-mecîd Hüseyin Efendi b. Bayezid meclis-i şer‘-i şerîf-i şâmihü’l-imâdda takrîr-i kelâm ve ta‘bîr-i merâm edip Haremeyn-i Şerîfeyn Evkāfı’ndan mahmiye-i Kostantıniyye mahallâtından Nahılbend mahallesinde vâki‘ hudûdunun bir tarafı Hüsrev Ağa b. Abdullah mülküne ve bir tarafı Ümmühânî Hatun bt. ( ) mülküne ve bir tarafı vakf-ı mezbûre ve bir tarafı tarîk-i âmma müntehî olup büyût-ı müte‘addideyi müştemil olup yevmî dört akçe icâre-i müeccele ile sâkin olduğum menzil bundan akdem bi’l-külliye harâba müşrif olup süknâya kābil olmamağın semân ve elf senesi Saferi’nin evâilinde izn-i mütevellî ile kendi mâlımdan müceddeden tahtânî bir oda ve iki bâb ahır ve fevkānî üç bâb oda ve bir şehnişîn ve iki tahta-pûş binâ edip ba‘dehû kıbel-i şer‘den nâib ve mi‘mâr irsâl olunup târîh-i mezbûrda evkāf-ı mezbûre mütevellîsi olan Mustafa Bey b. Mehmed mahzarında keşf olundukda cümle harc u sarfımız yüz doksan üç bin akçe olmağla yedime hüccet-i şer‘iyye verilmişidi. Ba‘dehû yine menzil-i mezbûrda iki fevkānî ve bir tahtânî odaların ve bir kilârın duvarları ve camları ve nerdübânları ve pencereleri tecdîden ve ta‘mîre ve müceddeden bir kilâ[r] ve bir fırın binâsına ve hamâmın câmekânı ve suyolları ve su terâzisi meremmâta muhtâc oldukda izn-i şer‘le kendi mâlımdan tecdîd ve ta‘mîr eylemişidim, hâlâ kıbel-i şer‘den üzerine varılıp ne mikdâr akçeye tahammülü vardır keşf olunmasın taleb ederim dedikde bu fakīr ve hâssa mi‘mârlardan üstâd Mehmed b. Üveys zeyl-i kitâbda mastûrü’l-esâmî olan Müslimîn ile menzil-i mezbûrun üzerine varılıp bi’l-fi‘il evkāf mütevellîsi olan Hamza Bey b. Abdullah muvâcehesinde keşf olundukda fi’l-hakīka zikr olunan odalar ve nerdübânlar ve hamâm ve suyolları ve su terâzisini vech-i mezkûr üzere tecdîd ve ta‘mîr olunmağın bu cümleye sarf olunan kerestenin ve camlarının ve mismârının ve üstâdiyye ve ırgadiyye ve hammâliyesinin yüz otuz bin dört yüz akçeye tahammülü vardır deyu mi‘mâr-ı mezbûr ve sâir ehl-i vukūf Müslimânlar ittifâk eylediklerinde müşârun-ileyh Hüseyin Efendi’nin menzil-i mezbûra mukaddemâ sarf edip yedinde hüccet-i şer‘iyyesi olan yüz doksan üç bin akçe ile şimdi keşf olunan yüz otuz bir bin dört yüz akçesi cem‘an üç yüz yirmi dört bin dört yüz akçe olmağın mâ-hüve’l-vâkı‘ bi’t-taleb ketb olundu. Tahrîren fî-evâili Şa‘bâni’l-mu‘azzam min-şühûri sene sitte aşere ve elf. Şühûdü’l-hâl: Mehmed Efendi b. Yunus el-Müderris, Hasan Çavuş b. Abdülmennan, Mustafa Çelebi b. İskender el-Bevvâb, Mehmed Bey b. Hızır el-Bevvâb, el-Hâc Hasan b. Abdullah ve gayruhüm mine’l-hâzırîn.