Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 123 Hüküm no: 59 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime Hatun bt. Hüseyin’in oturduğu Hüseyinağa mahallesindeki Haremeyn Evkafı’na ait evde yapılan tadilatın keşfinin yapıldığı Mahmiye-i İstanbul’da Ayasofya-i sagīr kurbünde Hüseyinağa mahallesi sâkinelerinden fahrü’l-muhadderât bâ‘isü’l-kitâb Rahime Hatun bt. Hüseyin meclis-i şer‘-i şerîfe gelip Haremeyn-i Şerîfeyn -şerrefehallâhu te‘âlâ- Evkāfı’ndan olup mahalle-i mezbûrede vâki‘ bir tarafı evkāf-ı mezbûreye ve bir tarafı Ayasofya-i sagīr Vakfı’na ve bir tarafı ahır kethüdâsı Ahmed Bey mülküne ve bir tarafı tarîk-i âm ile mahdûd olup otuz üç bin akçe ücret-i mu‘accele ve yevmî iki akçe ücret-i müeccele ile tasarrufumda olan menzilin bazı mevâzi‘i tecdîde muhtâc olup bundan akdem harcım ücret-i mu‘acceleye zam olunmak üzere kendi mâlım ve izn-i mütevellî ile tecdîd etmiş idim hâlâ cânib-i şer‘-i şerîfden üzerine varılıp mâlımdan harc ettiğim meblağın ne mikdâra tahammülü vardır görülüp mahallinde tahrîr olunması matlûbumdur demeğin cânib-i şer‘-i şerîfden fahrü’l-müderrisîn Mevlânâ Mahmud Efendi irsâl olundu hâssa mi‘mârlardan üstâd Ali b. Halil ile ve zeyl-i kitâbda isimleri mastûr olan bî-garaz ehl-i vukūf Müslimânlar ile menzil-i mezbûrun üzerine varılıp evkāf-ı mezbûre mütevellîsi fahrü’l-akrân el-Hâc Hasan Bey b. Mehemmed huzûrunda keşf ve müşâhede ettiklerinde menzil-i mezbûrun içinde olan sofanın tûlen altı ve kadden yedi bi-hesâb-ı şatrancî kırk iki zirâ‘ taş duvar ve üzerinin sakfı ve hatılları ve kenîf önünde vâki‘ câmeşûy için ihdâs ettiği kuyunun taş duvarı ve üzerinin kaldırımları ve orta kapı bölmesinin üzerinin saçağı ve pedavrası ve kiremidi tecdîd olunmuş bulunup bu cümlenin muvâzene ve mismâriyyesine ve hammâliyesine ve üstâdiyye[si]ne ve ırgadiyyesine harc u sarf olunan meblağın dört bin yirmi akçeye tahammülü vardır bu mikdârdan noksân ile olmaz deyu zikr olunan mi‘mâr ve sâir Müslimîn ittifâk üzere haber verdiklerin mevlânâ-yı merkūm mahallinde tahrîr edip ba‘dehû gelip vâki‘ hâli meclis-i şer‘de ihbâr ettikden sonra meblağ-ı mezbûr ücret-i mu‘accele-i sâbıkaya zam olunup cümle ücret-i mu‘accelesi otuz yedi bin yirmi akçe olup ve mütevellî-i merkūm el-Hâc Hasan Bey zikr olunan iki akçe ücret-i müeccelenin yevmî bir akçesin menzil-i mezbûrun meremmetine sarf etmeğe merkūme Rahime Hatun’a izin vermeğin cânib-i şer‘den dahi icâzet verilip vâki‘ hâli bi’t-taleb ketb olundu. Tahrîren fî-gurreti Saferi’l-hayr li-sene ihdâ ve ışrîn ve elf. Şühûdü’l-hâl: Mustafa Bey b. Abdullah el-bevvâb, Ferhad Bey b. Abdullah el-bevvâb, Ali Bey b. Abdullah el-bevvâb, Ahmed Çelebi b. ( ) el-bevvâb, Ömer b. Hüseyin, Ali b. Abdullah, el-Hâc Mehmed b. Hüseyin, Hızır b. Abdullah ve gayruhüm.