Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 124 Hüküm no: 61 Orijinal metin no: [19a-3, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kamer Hatun bt. Abdullah vakfiyesi Cera’l-emrü hasbe-mâ hurrire fîhi bi-ma‘rifeti’l-fakīr Abdullah b. Hüdâverdi el-Müvellâ bi-mahkemeti Davudpaşa Elhamdü li-veliyyihî ve’s-salâtü alâ-nebiyyihî Muhammedin ve âlihî ecma‘în, ammâ ba‘d, işbu mazmûnunda vakıf ikrârından bahseden sahîh ve şer‘î bir hüccettir. Kamer Hatun bt. Abdullah nâm hatun meclis-i şer‘-i şerîfe hâzır olup işbu ikrârın kendisinden sudûruna kadar mâliki olduğu ve taht-ı tasarrufunda bulundurduğu, mahmiye-i Kostantıniyye mahallâtından Davutpaşa mahallesinde kâin, tahtânî ve fevkānî birer bâb hâneyi, sofayı, su kuyusunu, kenîfi müştemil, hudûdu bir tarafından Ali Bey b. Abdullah mülkü, bir tarafından Zamâne Hatun Vakfı, iki tarafından tarîk-ı hâs ile mahdûd olan menzilini cümle tevâbi‘i ve levâhıkıyla habs ve vakfettiğini ikrâr ve i‘tirâf eyledi. Süknâyı müddet-i hayâtınca evvelâ kendisine, vefâtından sonra Canfedâ bt. Abdullah nâm mu‘takasına her gün sûre-i İhlâs’ı üç kere okuyup sevâbını vâkıfe-i mezbûrenin rûhuna hediye etmesi kaydıyla şart etti. Sonra mezbûre Canfedâ’nın evlâdına, evlâd-ı evlâdına ile’l-inkırâz şart eyledi. Sonra Medîne-i münevvere fukarâsına şart eyledi.Tevliye, ta‘mîr ve meremmeti menzil-i mezbûrda sâkin olan kimselere şart eyledi. Nezâret-i hasbiyyeyi de mahalle-i mezbûre ahâlîsine şart etti. Tebdîl ve tağyîri yedinde hıfz eyledi. Sonra menzil-i mezbûru tescîl maksadıyla mütevellî nasbettiği Seyyid Mehmed b. Seyyid Mehmed’e teslîm etti. Vâki‘ ikrâr mütevellî-i mezkûr tarafından vicâhen ve şifâhen tasdîk edildi. Hâl bu minvâl üzere iken vâkıfe-i mezbûre vakf-ı akār İmâm-ı A‘zam Hazret-i Ebû Hanîfe-i Kûfî hazretleri yanında lâzım değildir diyerek vakfiyyetten rücû‘ edip menzil-i mezkûrun silk-i mülküne idhâlini talep ve mütevellî-yi mezkûrdan istirdâd eyledi. Mütevellî redden imtinâ‘ edince hâkim-i muvakki‘ü’l-kitâb huzûrunda murâfa‘a edip tarafeynden hüküm taleb ettiklerinde hâkim-i mûmâ-ileyh, cânib-i vakfı ihtiyâr edip menzil-i merkūmun vakfiyetinin lüzûmuna -âlimen bi’l-hilâf beyne’l-eimmeti’l-eşrâf- hükmetmekle vakf-ı mezbûr müseccel, müebbed bir vakıf olarak bi’l-ittifâk evkāf-ı lâzimeden oldu. Cerâ zâlike ve hurrire fî evâsıtı Saferi’l-hayr li-sene ihdâ ve ışrîn ve elf. Şühûdü’l-hâl: Selim b. Hasan er-râcil, Hasan b. Abdullah, er-râcil, Mehmed Bey b. Hüseyin, el-cündî, Ali Beşe b. Abdullah, er-râcil, Ali Bey b. Abdullah el-cündî, Mehmed Çavuş b. Hüseyin, Mustafa Bey dîdebân, Hüseyin b. Abdullah er-râcil, Ca‘fer Bey b. Abdullah el-cündî, Sefer Bey b. Abdullah, Mehmed Efendi el-müderris