Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 125 Hüküm no: 62 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine-i Münevvere Evkafı’na ait ev ile Dergâh-ı Mualla müteferrikalarından Hüseyin’e ait evin mübadele edildiği İftihârü’l-ulemâi’l-muhakkıkīn muhtârü’l-fuzâlâi’l-müdekkıkīn yenbû‘ü’l-fazli ve’l-yakīn el-muhtassu bi-mezîdi inâyeti’l-meliki’l-mu‘în müderrisînden olup hâlâ evkāf müfettişi olan Mevlânâ ( ) -dâmet fezâiluhû- tevkī‘-i refî‘-i hümâyûn vâsıl olıcak ma‘lûm ola ki düstûrü’l-ekrem müşîr-i efham nizâmü’l-âlem vezîr-i a‘zam ve serdâr-ı ekrem Nasuh Paşa -edâmallâhu te‘âlâ iclâlehu-’nun kethüdâlığı hizmetinde olup Dergâh-ı mu‘allâm müteferrikalarından olan iftihârü’l-emâcid ve’l-ekârim Hüseyin -dâme mecduhû- südde-i sa‘âdetime arzuhâl sunup mahrûse-i İstanbul’da Abdullahağa mahallesinde ma‘lûmü’l-hudûd bir mülk evi olup ve yine mahrûse-i mezbûrede Akbıyık mahallesinde olan ba‘dehû Medîne-i Münevvere’ye vakf olan bir bâb evkāf-ı evlâddan Ömer nâm kimesne tasarrufunda olup harâba müşrif olup bunun eviyle mübâdele etmek murâd edinip mübâdele olunmak vakfa evlâ olup pâye-i serîr-i a‘lâya arz olundukda tebdîl oluna deyu hatt-ı hümâyûn-ı izzet-makrûnum sâdır olmağın buyurdum ki ( ) vusûl buldukda bu bâbda sâdır olan hatt-ı şerîfim mûcebince zikr olunan ev vakfa mu‘âdil olup ihtiyârlarıyla mübâdele ederler ise bir birlerine tebdîl edip hüccet ve vakfiyelerin veresiz şöyle bilesiz alâmet-i şerîfe i‘timâd kılasız. Tahrîren fî-evâsıtı şehri Saferi’l-hayr sene ihdâ ve ışrîn ve elf. Be-mekām-ı Kostantıniyye el-mahrûse M. [Yukarıdaki hüküm ile altındaki sicil aynı konuyu ihtiva ettiği için tek sicil numarası verildi.] Medîne-i Münevvere ve Taybe-i tayyibe-i mutahhara evkāfı mütevellîsi fahrü’l-bevvâbîn bi-bâbi’s-sultâni’l-müeyyed el-Hâc Hasan Bey b. Mehemmed ve menzil-i vakf-ı âti’l-beyânı evlâdiyyet üzere mutasarrıf olan Ömer Bey b. Mustafa meclis-i şer‘-i şerîf ve mahfil-i dîn-i münîfe gelip Dergâh-ı Âlî -dâme mahfûfen bi’l-me‘âlî- müteferrikalarından işbu bâ‘isü tahrîri’l-kitâb el-ârî ani’l-irtiyâb iftihârü’l-emâcid ve’l-ekârim Hüseyin Ağa b. Abdüddâim mahzarında ikrâr ve takrîr-i kelâm edip evkāf-ı mezbûreden olup mahmiye-i Kostantıniyye’de Akbıyık mahallesinde vâki‘ bir tarafı Hüseyin Çavuş mülküne ve bir tarafı Sittî Hatun’a vakf olan menzile ve bir tarafı Sarayağası mülküne ve bir tarafı Süleyman Çelebi mülküne ve bir tarafı tarîk-i hâssa müntehî olup dâhiliyyesi Hüseyin Çavuş tarafından tahta havlu ve fevkānî üzerleri çatılı iki odayı ve tahtânî dahi iki odayı ve bir su kuyusunu ve kenîfi müştemil ve hâriciyyesi kapı üzerinde iki tahta odayı ve altında bir ahırı ve kenîfi muhtevî olan menzili Hasan b. Yusuf nâm kimesne vakfedip süknâsını evvelâ nefsine ba‘dehû zevcesi Şirin bt. Abdullah nâm hatuna ve kız karındaşı Esmâ nâm hatuna ba‘dehümâ evlâdına ve evlâd-ı evlâdına ve ba‘de’l-inkırâz Medîne-i Münevvere fukarâsına şart edip hâlâ şart-ı mezkûr üzere nevbet-i tasarruf evlâda gelip evlâddan mezkûr Ömer Bey sâkin olup ve mûmâ-ileyh Hüseyin Ağa’nın mahmiye-i mezbûrede Abdullahağa mahallesinde vâki‘ dâhiliyyesi fevkānî bir şehnişîni ve ocaklı ve masandıralı ve üç Arabî pencereli ve ikişer dolablı ve tuğlalı ve döşemeli ve dolma duvarlı ve camlı iki aded odayı ve bir sofa ve iki dahlîzi ve yedi ad[ed] trabzanlı tahta-pûşu ve nerdübânı ve kenîfi ve tahtânî bir su kuyusunu ve cüneyneyi ve hâriciyyesi iki oda ve bir şehnişîni ve bir selâmlığı ve iki nerdübânı ve bir su kuyusunu ve bir ahırı ve kenîfi müştemil iki tarafı Medîne-i Münevvere Vakfı’na ve bir tarafı bostana ve bir tarafı tarîk-i âmma müntehî olup menzil-i mezbûru vakf-ı merkūmun menzil-i mersûmuna bedel vermek murâd eder deyicek cânibeynin iltimâsları ile mi‘mârbaşı iftihârü’l-emâcid ve’l-ekârim câmi‘ü’l-mehâmid ve’l-mekârim Mehemmed Ağa b. Abdüddâim ve ahvâl-i binâya vâkıf Müslimânlardan cem‘-i kesîr birle menzil-i mezkûreynin üzerlerine varılıp menzil-i vakfın arsası bennâ zirâ‘ı ile hesâb-ı şatrancî üzere altı yüz seksen zirâ‘ ve binâ ve arsasının kıymeti kırk bin akçe ve cânib-i vakfa âid ecr-i misli [20a] yevmî iki akçe olup ve menzil <> arsası zirâ‘-i mezbûr ve hesâb-ı mezkûr ile yedi yüz otuz bir zirâ‘ ve binâ ve arsasının kıymeti seksen bin akçe ve ecr-i misli yevmî beş akçe olup istibdâl-i mezkûrun vakfa enfa‘ olduğu müşâhede ve mahsûsu olmağın izn-i hümâyûn sudûru ricâsına Âsitâne-i sa‘âdete arz olundukda istibdâl oluna deyu fermân-ı âlîyi müştemil emr-i şerîf vârid oldukdan sonra mezkûr Ömer Bey ve mütevellî-i merkūm el-Hâc Hasan Bey menzil-i vakf-ı mersûmu mûmâ-ileyh Hüseyin Ağa’nın mülkü olan menzil-i mesfûru ile istibdâl edip menzil-i vakf-ı mezbûru bi tarîkı’l-istibdâl mülk olmak üzere mûmâ-ileyh Hüseyin Ağa’ya teslîm edip ve müşârun-ileyhin menzil-i mezkûru da vakfiyet üzere vakf için kabz ve tesellüm ettiklerinde istibdâl-i merkūmun sıhhatine hüküm-birle bu vesîka-i enîka alâ-mâ-hüve’l-hakīka ketb ve imlâ ve yed-i tâlibe vaz‘ ve def‘ olundu lede’l-hâce müzekkir-i mâ-cerâ ola. Tahrîren fî-evâhiri Saferi’l-hayr li-sene ihdâ ve ışrîn ve elf. Şühûdü’l-hâl: Fahrü’l-emâcid Mehmed Ağa b. Osman el-Müteferrika, Ali Çavuş b. Abdullah, İsmail <> b. Abdürrezzak el-İmâm, Abdi Hoca b. Abdürrahim el-Müezzin, Ali Bey b. Hasan, el-Hâc Hüseyin b. Mehmed, Mehmed Ağa b. Mustafa, Kasım Bey b. Abdullah el-Cündî, Mustafa Bey b. Hamza el-Cündî, Firdevs Ağa b. Abdullah, Hüseyin Bey b. Süleyman el-Cündî, üstâd Abdürrahim et-Tabbâhü’s-sultânî, Hızır Bey b. Yusuf Sernefer-i mehterân, Mustafa Bey b. ( ) el-Cündî, Mehmed Bey b. Mahmud, Memi Bey b. Abdullah, Kâtibü’l-hurûf Ramazan el-Müderris ve gayruhüm