Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 105 Hüküm no: 113 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Etrafına topladığı adamlarıyla eşkıyalık yapan Emir Ahmed’in yakalanması Kıdvetü’l-emâcid ve’l-a‘yân hasekiyân-ı hâssadan zikri âtî şakīlerin ahz ve Der-aliyyeme ihzârlarına hâssaten mübâşir ta‘yîn olunan Mehmed Emin Haseki -zîde mecdühû- ve mefâhirü’l-kuzât ve’l-hükkâm ma‘denü’l-fezâil ve’l-kelâm eşkıyâ-yı mezbûrenin geşt ü güzâr üzere oldukları mahâlleri kuzât ve nüvvâb -zîde fazluhum- ve mefâhirü’l-emâsil ve’l-akrân yeniçeri serdârı ve sâir zâbitân -zîde kadruhüm- tevkī‘-i refî‘-i hümâyûn vâsıl olıcak ma‘lûm ola ki Emir Ahmed nâm müfsid iki sene mukaddem cezâsı tertîb olunan Kürt Veli nâm şakīnin refîki olduğuna binâen ol hînde firâr ve <> hâlâ yine zuhûr edüp yanında olan on bir nefer rüfekāsı eşkıyâ ile İznikmid <> havâlîlerinden ve Gekbûze ve Taşköprü kurâsı ve sâir koru-yı hümâyûnum dâhilinde vâki‘ karyelerde serserî geşt ü güzâr <> ve ebnâ-i sebîle itâle-i dest-i hasar üzere oldukları Der-aliyyeme sıhhati ihbâr olunmağın sen ki haseki-i mûmâ-ileyhsin eşkıyâ-i mezbûre havâlî-i merkūmede ol mahâlde bulunur ise serdâran ve zâbitân-ı mûmâ-ileyhim ile bi’l-ittifâk alâ-eyyi hâl cümlesi ahz ve Dersa‘âdetime ihzâr içün sen hâssaten mübâşir ta‘yîn olunmuşsundur imdi işbu emr-i şerîfimle ol tarafa varup sâlifü’z-zikr Emir Ahmed ve rüfekāsı <> şakīler el-yevm kangı yerde olduklarını gereği gibi haber alıp ibrâz-ı hüsn-i tedbîr ve gayret ederek mûmâ-ileyhim ile bi’l-ittifâk bulundukları yerlerde mecmû‘unu ahz ü bend edüp bu tarafa ihzârlarına sa‘y ü ihtimâm eyleyüp sû-i tedbîr ve hareketinden nâşî eşkıyâ-yı mezbûre ahz olunmayup âhar taraflara firâr eylemelerinden ve bu vesîle ile ahâlî ve re‘âyâdan akçe ahzına ve şekāvetde medhali olmayanları ta‘addîye tasaddîden ziyâde hazer ve mücânebet eyleyesin ve siz ki mûmâ-ileyhimsiz ber-[vech-i] muharrer fermânım olundukda üzere eşkıyâ-i mezbûrenin haseki-i mûmâ-ileyh mübâşeretiyle ol havâlîlerde bulundukları mahâllerde bi-eyyi vechin-kân ahz ü ihzârlarına her birleriniz mezîd-i sa‘y ü gayret ve bu bâbda müsâmahadan cümleniz gāyetü’l-gāye tehâşî ve mübâya‘at [mübâ‘adet] ve infâz-ı emr-i hümâyûnumda ale’l-ittifâk hareket eylemeniz bâbında fermân-ı âlîşânım sâdır olmuşdur buyurdum ki vusûl buldukda vech-i meşrûh üzere şeref-yâfte-i sudûr olan fermân-ı vâcibü’l-imtisâlim mazmûn-ı münîfi üzere itâ‘at ve makrûnuyle âmil olup hilâfından gāyetü’l-gāye tehâşi ve mücânebet eyleyesiz şöyle bilesiz alâmet-i şerîfime i‘timâd kılasız. Tahrîren fî-evâhiri şehri Zilka‘de li-sene ihdâ ve semânîn ve mi’ete ve elf. Mûcebince mektûb-ı sadrıâzamî kayd şüd.