Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 135 Hüküm no: 71 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’na ait Aksaray’daki evin Ramazan b. Ali tarafından kiralanması Haremeyn-i Şerîfeyn -şerrefehallâhu te‘âlâ- mütevellîsi fahrü’l-bevvâbîn Hasan Bey b. Mehmed meclis-i şer‘-i şerîfe gelip işbu hâmilü’l-kitâb el-Hâc Ramazan b. Ali mahzarında ikrâr ve takrîr-i kelâm edip evkāf-ı mezbûrun olup mahmiye-i İstanbul’da Aksaray kurbünde Alemîbey mahallesinde vâki‘ iki fevkānî ve iki tahtânî evleri ve bir ıstablı ve fırını ve cüneyneyi ve bi’r-i mâyı ve kenîfi müştemil olup bir tarafı Tûtî Bula Vakfı’na ve bir tarafı Halil Usta mülküne ve bir tarafı tarîk-i hâssa ve bir tarafı tarîk-i âmma müntehî olup Ferzan nâm hatun vakfettiği menzili on bin akçe icâre-i mu‘accele ve yevmî iki akçe icâre-i müeccele ile mezbûr el-Hâc Ramazan’a tevliyetim hasebiyle îcâr ettim ol dahi kabûl ve istîcâr ettikden sonra harcı ücret-i mu‘accelesine munzam ve ettiği ta‘mîr ve binâ-i cedîd asl-ı vakfa mülhak olmak üzere ta‘mîre ve binâ-i cedîd ihdâsına izin verdim zikr olunan yevmî iki akçe ücret-i müecceleyi mâh be-mâh cânib-i vakfa edâ edip mutasarrıf ola dedikde mukırr-ı mezbûru ikrâr-ı meşrûhunda mezkûr el-Hâc Ramazan dahi vicâhen tasdîk ve şifâhen tahkīk ettikde cânib-i şer‘-i şerîfden dahi temessük taleb ettikleri ecilden bu vesîka li ecli’t-temessük ketb olundu. Tahrîren fî-evâsıtı şehri Ramazâni’l-mübârek li-sene ihdâ ve ışrîn ve elf. Şühûdü’l-hâl: eş-Şeyh Mustafa Efendi b. Haydar, Mustafa Efendi b. el-Hâc Ahmed Efendi, Resul Efendi b. Mustafa, Nurullah Efendi b. Musa, Cemal Efendi b. Hüseyin el-imâm, Hüsam Efendi b. ( ) el-müderris, Veli Efendi b. ( ) el-müderris, Atâullah b. ( ), İsmail Ağa b. Abdullah es-serrâcü’s-sultânî, Mehmed Bey b. Abdullah el-bevvâbü’s-sultânî, Ahmed b. Derviş, Nedim b. ( ) el-müezzin ve gayruhüm.