Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 134 Hüküm no: 70 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’na ait Avratpazarı’ndaki evde yapılan tadilat dolayısıyla keşif yapıldığı Haremeyn-i Şerîfeyn -şerrefehallâhu te‘âlâ evkāfı mütevellîsi fahrü’l-akrân el-Hâc Hasan Bey b. Mehmed meclis-i şer‘-i şerîfe gelip evkāf-ı mezbûreden olup mahmiye-i İstanbul’da Avratpazarı nâm mevzi‘ kurbünde vâki‘ bir tarafı merhûm Cerrâh Mehmed Paşa Hamâmı’na ve bir tarafı Bektaş Çelebi mülküne ve iki tarafı tarîk-i âmma müntehî olup dâhiliyye ve hâriciyye iki muhavvatayı müştemil olup merkūm Nurullah Çelebi b. Ali vakfettiği menzilin hâriciyyesinde ahır üzerinde vâki‘ üç bâb oda ve bir sofa ve bir kenîfi bî-üslûb olup ve hâlâ icâre-i mu‘accele ve müeccele ile mutasarrıf olan fahrü’l-emâcid ve’l-ekârim Sarây-ı atîk baltacıları kethüdâsı el-Hâc Hüseyin Ağa b. Abdüddâim harcı ücret-i muaccelesine munzam ve binâsı asl-ı vakfa mülhak olmak üzere zikr olunan üç bâb oda ve sofa ve kenîfi ve havlu duvarlarından kireç ile binâ olunmuş ve bir duvarı hedm ve üslûb-ı mergūb üzere binâ ve müceddeden bir matbah ve bir kilâr ihdâs etmeğe râgıb olmağın ben dahi vakfa enfa‘ olduğu ecilden tevliyetim hasebiyle vech-i meşrûh üzere tağyîr ve ta‘mîre izin verdim lâkin cânib-i şer‘-i şerîfden üzerine varılıp ba‘de’n-nazar zikr olunan lâzımü’l-hedm binâların kıymetleri tahrîr olunmak matlûbumdur dedikde hâssa mi‘mârlardan üstâd Mustafa b. Abdullah ile menzil-i mezbûrun üzerine varılıp müste’cir-i müşârun-ileyh ve mütevellî-i mûmâ-ileyh mahzarlarında nazar olundukda ebniye-i mezkûrenin mebniyeten kıymetleri altı bin akçeye tutuldukdan sonra minvâl-i meşrûh üzere olması enfa‘ olduğu ecilden cânib-i şer‘-i şerîfden dahi icâzet verilip mâ-hüve’l-vâkı‘ ketb ve cem‘ ve yed-i tâlibine def‘ [ve] vaz‘ olundu. Tahrîren fî-evâili Şa‘bâni’l-mu‘azzam li-sene ihdâ ve ışrîn ve elf. Şühûdü’l-hâl: Sinan Ağa el-müteferrika, Mahmud Ağa Çâşnigîr, Mustafa Ağa Çâşnigîr, Ahmed Efendi el-muhâsebe, Mehmed Teberdâr, Bayezid b. Abdullah, Hasan Teberdâr, Bektaş Kâtib-i sâbık, Mustafa b. Yusuf, Mehmed b. Abdullah, İsmail b. Abdullah.