Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 136 Hüküm no: 73 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Baltacılar kethüdası Şahbaz Ağa’nın Medine-i Münevvere Vakfı’na ait kiraladığı ev için temessük verildiği Sarây-ı cedîd-i sultânî’de hâssa teberdârlar kethüdâsı olan fahrü’l-a‘yân zahrü’l-akrân Şahbaz Ağa b. Abdülmennan meclis-i şer‘-i şerîf ve mahfil-i dîn-i münîfe gelip mahmiye-i İstanbul’da Eminbey mahallesinde vâki‘ bir tarafı Medîne-i Münevvere Vakfı’na ve bir tarafı Emin Bey Vakfı’na ve iki tarafı tarîk-i âmma müntehî hâriciyyesi bir ahırı ve üzerinde bir bâb küçük odayı ve onun üzerinde tavanlı bir büyük odayı ve bir şehnişînli odayı müştemil ve dâhiliyyesi tahtânî iki bâb evi ve bir sofayı ve bir matbahı ve bir hamâmı ve su kuyusunu ve kenîfi ve fevkānî üç tabakayı ki tabaka-i ûlâsı üç bâb evi ve tabaka-i sâniyesi iki bâb odayı ve iki sofayı ve önünde dahlîzi ve tahta-pûşu ve tabaka-i sâlisesi bir köşkü muhtevî olan fırını bundan akdem merhûme ve mağfûrun-lehâ Niyazi Hatun’un vakf ve süknâsını zevci Lütfi Ağa’ya ba‘dehû evlâdına ba‘dehüm Medîne-i Münevvere fukarâsına şart edip ber-mûceb-i şart-ı vâkıfe içinde Lütfi Ağa sâkin iken fevt olup ba‘dehû sagīre kızı Âişe sâkine olup hâlâ mezbûre Âişe dahi fevt olup nevbet-i tasarruf Medîne-i Münevvere Vakfı’na intikāl etmeğin menzil-i mezbûru bi’l-fi‘il Medîne-i Münevvere evkāfı mütevellîsi fahrü’l-akrân el-Hâc Hasan Bey b. Mehmed el-bevvâbü’s-sultânî zabt edip yirmi bin akçe icâre-i mu‘accele ve yevmî dört akçe icâre-i müeccele ile bana îcâr ve teslîm edip ben dahi vech-i meşrûh üzere kabûl ve istîcâr ettikden sonra yedimden meblağ-ı mezbûru vakf için ahz u kabz edip yedime tezkire vermişdir deyu mütevellî-i merkūmun imzâsı ile mümzât ve hatemi ile mahtûme mazmûnu takrîr-i meşrûhuna muvâfık târîh-i kitâb şehr-i gurresi ile müverraha tezkire ibrâz edip mûcebince cânib-i şer‘-i şerîfden temessük iltimâs etmeğin ber-mûceb-i tezkire-i mezbûre bu hurûf li ecli’t-temessük ketb ve cem‘ ve yed-i tâlibine vaz‘ ve def‘ olundu. Tahrîren fî-evâili şehri Şevvâli’l-mükerrem li-sene ihdâ ve ışrîn ve elf. Şühûdü’l-hâl: Fahrü’l-müderrisîn Mahmud Efendi b. Abdükādir, muharrirü’l-hurûf Mehmed Efendi b. İbrahim, Abdurrahman Efendi b. İbrahim el-müderris, Ya‘kub Halîfe b. Sadullah, Mustafa Bey b. ( ) Teberdâr, Fahrü’l-akrân Süleyman Bey ser-bölük-i teberdârân, Hamza Bey b. ( )