Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 137 Hüküm no: 74 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Abdullah’a tasarrufundaki evin yanına yeni bina yapmasına izin verilmesi İşbu hâmiletü’l-kitâb Âişe Hatun bt. Abdullah meclis-i şer‘-i şerîf ve mahfil-i dîn-i münîfe gelip takrîr-i kelâm ta‘bîr ani’l-merâm edip Haremeyn-i Şerîfeyn -şerrefehallâhu te‘âlâ- Evkāfı’ndan olup mahmiye-i İstanbul’da Ayasofya-i sagīr kurbünde Hüseyinağa mahallesinde tûlen yirmi iki arzen yedi buçuk ki bi-hesâb-ı şatrancî yüz altmış dört zirâ‘ arz üzerinde vâki‘ hâriciyye ve dâhiliyye bir cânibi Küçük Ayasofya Vakfı’na ve bir cânibi evkāf-ı mezbûreye ve bir cânibi Kavuncu evine ve bir cânibi tarîk-i âmma müntehî olup hâriciyyesi bir ahır ve bir tamâm oda, onun üzerinde bir tahta-bend, onun üzerinde bir tavanlı ve ocaklı oda, onun üzerinde cüdrân-ı erba‘a ma‘a’s-sakf bir odayı ve dâhiliyyesi fevkānî bir ocaklı oda ve önünde bir tahta-pûş, onun üzerinde cüdrân-ı erba‘a ma‘a’s-sakf bir oda ve önünde bir dehlîz ve kenîfi müştemil menzili evkāf-ı mezbûre mütevellîsi fahrü’l-bevvâbîn Hasan Bey cânib-i vakıfdan on altı bin akçe icâre-i mu‘accele ve her ayda otuz akçe icâre-i müeccele ile bana îcâr ben dahi kabûl ve istîcâr ettikden sonra yedimden meblağ-ı mezbûru vakf için zabt edip harcı ücret-i mu‘acceleye mülhak ve binâsı asl-ı vakfa munzam olmak üzere kendi mâlım ile binâ-i cedîd ihdâsına izin verdi deyu mütevellî-i mûmâ-ileyhin imzâsı ile mümzâ ve hatemi ile mahtûme târîh-i kitâb ile müverraha mazmûnu takrîr-i meşrûhunda mutâbık tezkire ibrâz edip mûcebince cânib-i şer‘-i şerîfden dahi temessük iltimâs etmeğin cânib-i şer‘den dahi işbu hurûf ketb ve cem‘ ve yed-i tâlibine def‘ ve vaz‘ olundu. Tahrîren fî-evâhiri Şevvâli’l-mükerrem li-sene ihdâ ve ışrîn ve elf. Şühûdü’l-hâl: Mehmed Efendi b. İbrahim el-müderris, Ali Çelebi b. Halil el-mi‘mârü’l-hâssa, İbrahim Çelebi b. Abdülcelil, Ali b. İlyas, Abdurrahman Çelebi b. İbrahim el-müderris ve gayruhüm.