Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 282 Hüküm no: 238 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ligori v. Yorgaki’nin sebzeci gediği anlaşmazlığı Ma‘rûz, Sâdır olan fermân-ı âlîlerine imtisâlen zikri âtî husûsun mahâllinde bi’l-mu‘âyene keşf ve tahrîri için savb-ı şer‘i’l-enverden me’zûnen mürsel Başkâtib es-Seyyid Abdulkadir Efendi bi’l-ma‘iyye rü’yete memûr Evkāf müfettişi fazîletlü semâhatlü mîr es-Seyyid Mehmed Emin Âsaf Efendi tarafından mürsel Kâtib İbrahim Asım Efendi ve Ebniye-i hâssa Müdürü hulefâsından Mehmed Said ve Abdülaziz halîfler ile Haremeyn-i muhteremeyn Hazîne-i celîlesi’nden mazbût idâre olunan evkāfdan medîne-i Üsküdar’da Gerede mahallesinde kâin Bâbüssa‘âde Ağası esbak merhûm Gazanfer Ağa-yı Atîk Vakfı musakkafâtından zikri âtî münâza‘un-fîh olan bir bâb sebzeci dükkânı ve müfrez mağazaya varıp cerîdede mazbûtü’l-esâmî Müslimîn huzûrlarında akd-i meclis-i şer‘-i nebevî etdiklerinde zikirleri mürûr eden sebzeci dükkânı ve mağazaya bâ-temessük-i mütevellî bi’l-icâreteyn mutasarrıf olan derûn-ı arzuhâlde mezkûrü’l-ism Ligori v. Yorgaki zimmî meclis-i ma‘kūd-ı mezkûrede mârrü’l-beyân sebzeci dükkânı derûnunda mevcûde beyne’l-hıref gedik ta‘bîr olunur vakf âlât-ı lâzıme-i ma‘lûmenin şâyi‘an bâ-temessük-i nizâm mutasarrıfları olan ashâb-ı arzuhâl kendi nefsinden asıl ve şerîkleri Mehmed b. Mehmed ve Hasan b. İbrahim taraflarından husûs-ı âti’l-beyânda vekîlleri olduğu Murad b. Ömer ve el-Hâc Ömer Ağa b. Ahmed nâm kimesneler şehâdetleriyle sâbit olan teberdâr Mehmed Raşid Ağa b. el-Hâc Ali mahzarında işbu derûnunda akd-i meclis-i şer‘-i âlî olunup halîfetân-ı mezbûrân misâhalarıyla terbî‘an altmış zirâ‘ müfrez mağaza-i mezkûre derûnunda şeker ve kahve bey‘i için şürût ve nizâmına tatbîkan cânib-i evkāf-ı hümâyûndan temessük ahzıyla müceddeden gedik nakil murâd eylediğimde mârrü’l-beyân sebzeci gediği mutasarrıfları asıl ve müvekkilân-ı mezbûrân mağaza-i mezkûre sebzeci dükkânı müştemilâtındandır deyü fuzûlî zabt etmek murâdıyla mağaza-i mezkûre dahl ve ta‘arruz etmeleriyle mezbûrûnun dahl ve ta‘arruzları men‘ olunmak murâdımdır deyü eyledikleri da‘vâsını kâtib-i mezbûrân dâ‘îleri mahâllinde ketb ü tahrîr ve ma‘an meb‘ûs ümenâ-i şer‘le Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘a gelip tarafeyn hâzır oldukları hâlde tasdîklerine mukārin alâ-vukū‘ihî ba‘de’l-inhâ ve’t-takrîr müdde‘î-i mersûm Ligori zimmî ber-vech-i muharrer mutasarrıf olduğu sebzeci dükkânıyla mağaza-i mezkûreyi bilâ-gedik hüsn-i rızâ ve tayyib-i hâtırı ve ferâğ-ı mu‘teber-i kat‘î ile bâ-re’y-i mütevellî iki bin iki yüz elli guruş bedel-i makbûz ve müstehlek mukābelesinde asıl-ı mezbûr teberdâr Mehmed Raşid Ağa’ya ferâğ ve tefvîz etdiğinde ol dahi ber-vech-i muharrer teferru‘ ve tefevvüz ve kabûl edip fîmâ-ba‘d gerek dükkân-ı mezkûr ve gerek mağaza-i mezkûrede kat‘â alâka ve medhali kalmadığını mesfûr Ligori zimmî ikrâr ü i‘tirâf ve bu vechile kat‘-ı münâza‘a ve ref‘-i muhâsama eyledikleri tescîl ve huzûr-ı âlîlerine i‘lâm olundu. Fî 21 R sene [12]57.