Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 284 Hüküm no: 240 Orijinal metin no: [68b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cemile bt. İbrahim ile oğlu Hüseyin Efendi’nin Maltepe’deki bağlarını Mustafa Ağa’ya satmaları Mahmiye-i İstanbul’da Sarıgez (Sarıgörez) kurbünde Sarı Nasuh mahallesinde sâkin eşrâf-ı kuzâtdan es-Seyyid Mustafa Fehim Efendi b. Mehmed’in zevcesi olup zâtı ta‘rîf-i şer‘î ile mu‘arrefe olan Cemile Hanım bt. İbrahim ve sadrî kebîr oğlu Hüseyin Efendi b. el-mezbûr es-Seyyid Mustafa Fehim Efendi meclis-i şer‘-i şerîf-i enverde işbu bâ‘isü’l-vesîka Mustafa Ağa b. Mehmed nâm kimesne mahzarında zevci es-Seyyid Mustafa Fehim Efendi hâzır olduğu hâlde her biri ikrâr-ı tâm ve takrîr-i kelâm edip medîne-i Üsküdar’a muzâfe Kartal kasabası hudûdu dâhilinde vâki‘ Maltepe toprağında Camlı Çeşme demekle arîf nâm mahâlde etrâf-ı erba‘adan Sakızlıoğlu ve Selim Ağa oğulları tarlaları ve mârru’z-zikr Kartal kasabası ile Maltepe sınırı ve tarîk-i hâs ve tarîk-i âm ile mahdûd derûnunda bi’r-i mâ ve eşcâr-ı müsmire ve gayrı müsmireli tahmînen dört bin kütük kürûmu mülk bir kıt‘a bağ ale’l-iştirâk yedimizde mülkümüz iken bin iki yüz elli üç senesi şehr-i Rebî‘ülevveli selhinde mezbûr Mustafa Ağa’nın malından bi’l-ma‘iyye iktirâz ve kabz eylediğimiz dört bin beş yüz guruş mukābelesinde merkūm Mustafa Ağa’ya bi-tarîkı’l-istiğlâl bey‘ ve teslîm eylediğimizde ol dahi ber-vech-i muharrer iştirâ ve kabûl etmiş idi. El-hâletü hâzihî biz meblağ-ı mezkûr dört bin beş yüz guruşu bu def‘a merkūm Mustafa Ağa’ya teslîm eylediğimizde ol dahi bağ-ı mahdûd-ı mezkûru fekk-i istiğlâl birle bize teslîm ve her birimiz âhar yedinden ahz ve teslîm eylediğimizden sonra biz bağ-ı mahdûd-ı merkūmu tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ile beş bin yedi yüz guruşa merkūm Mustafa Ağa’ya bey‘ ü temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezkûr beş bin yedi yüz guruşu bize def‘ ü teslîm eylediğinde biz dahi yedinden tamâmen ve kâmilen ahz u kabz etmemizle mebî‘-i mezkûrun tağrîr ve gabnine ve bi’l-cümle husûs-ı mezkûre müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik, fîmâ-ba‘d bağ-ı mahdûd-ı mezkûrda bizim aslâ ve kat‘â alâka ve medhalimiz kalmayıp müşteri-yi merkūm Mustafa Ağa’nın mülk-i müşterâsı ve hakk-ı sırfı olmuşdur, keyfe mâ yeşâ ve yahtâr mâlik ve mutasarrıf olsun dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 29 Ca sene [12]57.