Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 284 Hüküm no: 241 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden İbrahim Bey’in menzilinin oğlu Ahmed adına tescil olunması Ma‘rûz, Sâdır olan fermân-ı âlîlerine imtisâlen işbu i‘lâm ve hâmişinde mastûr derkenâra nazar olundukda Anadolu’da Kiğı kazâsına tâbi‘ Demiran karyesi toprağında kâin bir bâb konak bin iki yüz yirmi dokuz senesinden beri karye-i mezbûre ahâlîsinden derûn-ı i‘lâmda mezkûrü’l-ism müteveffâ İbrahim Bey’in ve yine karye-i mezbûre sâkinlerinden olup bundan akdem bi’l-cümle muhallefâtının ta‘yîn olunan mübâşiri ma‘rifetiyle cânib-i mîrî için zabt ve tahrîrine irâde-i seniyye ta‘alluk eden Adanalı Hasan Paşazâde müteveffâ Mehmed Bey’in muhallefâtından olarak cânib-i mîrîden müşterâ hayatında ile’l-vefât mülkiyet üzere bilâ-nizâ‘ tasarrufunda olup ba‘de vefâtihî Redif Asâkir-i Muntazama-i Şâhâne kāimmakāmlarından kezâlik derûn-ı i‘lâmda ismi mezkûr Ahmed Bey müteveffâ-yı merkūm İbrahim Bey’in sulbî sahîh oğlu ve hasran vârisi olmağla mülk-i mevrûsu olmak üzere târîh-i i‘lâm-ı mezkûre gelince mutasarrıf olduğu karye-i mezbûre ahâlîsi ile kurb ve civârında olan kurâ ahâlîlerinden sikāt-ı sahîhatü’l-kelimât bî-garaz kimesnelerin alâ-tarîkı’ş-şehâde ihbâr eyledikleri ve mahâllî sicilinde bu vechile mastûr ve mukayyed olup menzil-i merkūmda âhar kimesnenin alâka ve medhali olmadığı dahi meşhûr ve mütevâtir olduğundan bahisle taraf-ı saltanat-ı seniyyeden menzil-i mezkûrun kendüye sarâhaten temlîkini hâvî bir kıt‘a fermân-ı âlîşân ısdârıyla yedine i‘tâ buyurulması bâbında mûmâ-ileyh Ahmed Bey’in istid‘â-yı inâyet eylediği meâl-i i‘lâmdan müstebân olup ancak ber-mantûk-ı i‘lâm menzil-i mezbûre dâir muhallefât defterlerinde sarâhaten bir gûne kayd bulunmadığı nümâyân ise de fakat müteveffâ-yı merkūm İbrahim Bey ile oğlu mûmâ-ileyh Ahmed Bey’den her birinin menzil-i merkūmu zikr olunan yirmi dokuz senesinden târîh-i i‘lâm-ı mezkûra gelinceye değin yirmi yedi sene müddet ber-vech-i mülkiyet müstakıllen zabt ve tasarrufları ber-mantûk-ı i‘lâm-ı mezkûr bilâ-nizâ‘ olduğu sûretde ber-vech-i istid‘â mülknâme-i hümâyûn ısdârı re’y-i âlîlerine menût idüğü huzûr-ı âlîlerine i‘lâm olundu. Fî 13 C sene [12]57.