Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 198 Hüküm no: 130 Orijinal metin no: [48a-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simkeşân bölükbaşı Mustafa Ağa’nın vakfiyesi Vazaha indî cemî‘u mâ fîhi ve sahha ledeyye küllün mâ yehvîhi min-asli’l-vakfi ve’ş-şürûti ve vücûhi’l-mesârifi ale’n-nemati’l-mebsût ve ene kazaytü bi’s-sıhhati ve’l-lüzûmi fi’l-husûs ve’l-umûm ale’n-nehci’l-ma‘lûm vâkıfen alâ-mevâkıfi’l-hılâfi’l-cârî beyne’l-eimmeti’l-ecilleti’l-eşrâf ene’l-abdü’l-fakīr ileyhi sübhânehû te‘âlâ Abdürezzâk b. Halil el-me’mûr bi-teftîşi’l-evkāf -ufiye anhümâ- Elhamdü li-veliyyihî ve’s-salâtü ve’s-selâmü alâ-nebiyyihî ve alâ-âlihî ve sahbihî ecma‘în, ammâ ba‘d, işbu mazmûnunda vakıf ikrârından bahseden sahîh ve şer‘î bir hüccettir. Hâssa simkeşân bölükbaşı umdetü’l-a‘yân Mustafa Ağa b. ( ) meclis-i şer‘-i şerîfe gelip âti’z-zikr vakfına li-ecli’t-tescîl mütevellî nasbettiği bevvâb-ı sultânî fahrü’l-akrân Hasan Bey b. Süleyman mahzarında şöyle ikrâr ve i‘tirâf eyledi ki, işbu vakıf ikrârının kendisinden sudûruna kadar mâliki olduğu ve taht-ı tasarrufunda bulundurduğu, mahmiye-i medîne-i Kostantıniyye mahallâtından Nişancıbaşı-ı atîk mahallesinde vâki‘, fevkānî bir bab, tahtânî iki bâb hâneyi, ulvî ve süflî iki kileri, mutfağı, su kuyusunu, ahırı, kenîfi ve muhavvatayı hâvî, bir tarafından Madenci? Mehmed mülkü, bir tarafından Zevvâk-ı sultâni Mustafa Ağa mülkü, bir tarafından müşârun-ileyh Nişancıbaşı vakfı, bir tarafından tarîk-ı âm ile mahdûd bulunan cemî‘ menzilini cümle tevâbi‘i ve levâhıkıyla niyet-i hâlise ve taviyet-i vâfiye ile habsedip vakfetti. Vâkıf-ı mezbûr menzil-i mezkûrda süknâyı müddet-i hayâtınca kendisine, vefâtından sonra Âişe Hatun bt. Ahmed nâm zevcesine, sonra evlâtlığı Hadice bt. Ebubekir’e, sonra mezbûre Hadice’nin evlâdına, ile’l-inkırâz evlâd-ı evlâdına şart etti. Sonra mezbûre Hadice’nin vâlidesi Fâtıma Hatun bt. Ramazan’a, sonra evlâdına, evlâd-ı evlâdına, ile’l-inkırâz evlâd-ı evlâd-ı evlâdına şart etti. Sonra menzil-i mezbûrun icâre-i mu‘tâde ile icâreye verilip hâsıl olan ücret-i kirânın meremmet için lâzım gelen meblağın muhafazasından sonra Medîne-i münevvere fukarâsına irsâlini şart etti. Sonra menzil-i mezbûru mütevellîye teslîm eyledi. O dahî tesellüm edip sâir mütevellîler evkāfta nasıl tasarruf ettilerse öyle tasarruf eyledi. Hâl bu minvâl üzere iken vâkıf-ı mezbûr vakf-ı akār İmâm-ı A‘zam Hazret-i Ebû Hanîfe-i Kûfî hazretleri yanında lâzım değildir diyerek vakfiyyetten rücû‘ edip menzil-i mezkûrun silk-i mülküne idhâlini talep ve mütevellî-yi mezkûrdan istirdâd eyledi. Mütevellî redden imtinâ‘ edince hâkim-i muvakki‘ü’l-kitâb huzûrunda murâfa‘a edip tarafeynden hüküm taleb ettiklerinde hâkim-i mûmâ-ileyh, cânib-i vakfı ihtiyâr edip menzil-i merkūmun vakfiyetinin lüzûmuna -âlimen bi’l-hilâf beyne’l-eimmeti’l-eşrâf- hükmetmekle vakf-ı mezbûr, bey‘i, hibesi ve îrâsı câiz olmayacak şekilde, müseccel, müebbed bir vakıf olarak bi’l-ittifâk evkāf-ı lâzimeden oldu. Fe-men beddelehû ba‘de mâ semi‘ahû fe-innemâ ismühû ale’llezîne yübeddilûnehû inna’llâhe semî‘un alîm ve ecrü’l-vâkıf ale’l-hayyi’l-kerîm. Cerâ zâlike ve hurrire fî-evâili Şa‘bâni’l-mu‘azzam min-şühûri sene selâs ve ışrîn ve elf. Şühûdü’l-hâl: Mevlânâ Mustafa Halîfe el-imâm, İbrahim Halîfe b. Abdullah el-müezzin, İbrahim b. el-kayyım, Mustafa Ağa ez-zevvâku’s-sultânî, Mustafa Çelebi eş-şehîr bi-Kâtib-zâde Mustafa Çelebi eş-şehîr bi-Za‘îm-zâde, Yusuf Bey b. Abdullah ser-bölük-i simkeşân, Mehmed b. Süleyman, Ramazan b. ( ), el-Hâc Ahmed bölükbaşı-yı simkeşan, Yunus Halîfe el-kâtib, Muharrirü’l-hurûf Hüseyin b. Mehmed el-müderris ve gayrühüm men hazara’l-meclis