Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 217 Hüküm no: 153 Orijinal metin no: [53b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Reis b. Abdülmennan ve Kamer Hatun bt. Abdullah’ın zaptettikleri evleri vefat eden oğulları Mehmed Bey’in Haremeyn Evkafı’na vakfettiği Mahmiye-i İstanbul’da Haremeyn mütevellîsi Hasan Bey meclis-i şer‘de menzil-i âti’l-beyâna mülkiyet zum‘u ile vâzı‘ü’l-yed edenleri nehc-i mu‘teber üzere sâbit olup mahmiye-i Galata muzâfâtından kasaba-i Kasımpaşa’da Kulaksız Ahmed mahallesi sâkinlerinden Mustafa Reis b. Abdülmennan ve zevcesi Kamer Hatun bt. Abdullah muvâcehelerinde üzerlerine takrîr-i da‘vâ edip merkūm Mustafa Reis’in sulbî ve merkūme Kamer Hatun’un sadrî oğlu olup vefât eden Mehmed Bey nâm cündî bundan akdem hâl-i sıhhatinde mahalle-i mezbûrede vâki‘ üç bâb beyt-i ulvî ve sofayı ve ahırı ve bi’r-i ma‘yı ve kenîfi ve cüneyneyi müştemil olup bir tarafdan Emine Hatun bt. Abdullah mülkü ve iki tarafdan Mustafa Reis b. Abdullah mülkü ve bir tarafdan tarîk-i âm ile mahdûd olan mülk menzilini âmme-i tevâbi‘i ile ve kurbünde vâki‘ bir bâb beyt-i süflîyi ve sofayı ve bi’r-i mâyı ve cüneyneyi hâvî olup bir tarafdan Hasan b. Abdullah mülkü ve bir tarafdan Topçu Ahmed b. Abdullah mülkü ve bir tarafdan Hudâverdi Reis b. Abdullah mülkü ve bir tarafdan tarîk-i hâs ile mahdûd olan mülk menzilini cemî‘-i tevâbi‘i ile evvelâ kendi nefsine ba‘de vefâtihî sulbiye kızı Rahime’ye ve Rahime’nin evlâdına ve evlâd-ı evlâdına batnen ba‘de batnin ve ba‘de’l-inkırâz Medîne-i Münevvere fukarâsına vakf ve şart eyleyip hâlâ evlâd münkariz olmağla menzil-i mezkûra ber-mûceb-i şart-ı vâkıf mezbûr Medîne-i Münevvere fukarâsına âid olmuşiken mezbûr Mustafa Reis ve mezbûre Kamer Hatun fuzûlen zabt ve tasarruf edip vaz‘-ı yed ederler suâl olunup kasr-ı yed ettirilmesin taleb ederim dedikde gıbbe’s-suâl merkūm Mustafa Reis ve zevcesi merkūme Kamer Hatun cevâblarında zikr olunan evler oğlumuz müteveffâ-yı merkūm Mehmed Bey’den bize irs-i şer‘le intikāl eyledi vech-i meşrûh üzere vakıf olduğu ma‘lûmumuz değildir deyu inkâr ettiklerinde mütevellî-i merkūmdan takrîr-i da‘vâsına mutâbık beyyine taleb olundukda udûl-i Müslimînden olup mahalle-i mezbûre imâmı olan Mustafa Halîfe b. el-Hâc Halil ve müezzin Mahmud Çelebi b. Mustafa nâm kimesneler meclis-i şer‘a li-ecli’ş-şehâde hâzırân olup gıbbe’l-istişhâd fi’l-hakīka müteveffâ-yı merkūm Mehmed Bey hâl-i hayâtında zikr olunan evlerini evvelâ kendi nefsine ba‘de vefâtihî kızı Rahime’ye ve Rahime’nin evlâdına ve evlâd-ı evlâdına batnen ba‘de batnin ve ba‘de’l-inkırâz Medîne-i Münevvere fukarâsına vakf ve şart eyledi idi hâlâ evlâdı münkariz olmağla menzileyn-i mezkûreyn Medîne-i Münevvere fukarâsına âid olmuşdur biz bu husûsa şâhidleriz şehâdet dahi ederiz deyu edâ-i şehâdet-i şer‘iyye ettiklerinde gıbbe’t-ta‘dîl şehâdetleri hayyiz-i kabûlde vâki‘ oldukdan sonra mûcebi ile hükmolunup mâ-vaka‘a bi’t-taleb kebt olundu. Fî-gurreti şehri Şa‘bâni’l-mu‘azzam li-sene erba‘a ve ışrîn ve elf. Şühûdü’l-hâl: Abdürrahim Halîfe b. Mehmed, Ahmed Çelebi b. Mehmed, Hüseyin b. Mürüvvet, Hüseyin b. Hızır, Ahmed b. Bektaş, Hızır b. ( ) el-cündî ve gayruhüm.