Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 217 Hüküm no: 152 Orijinal metin no: [53a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha bt. Ahmed’in oturduğu Haremeyn Evkafı’na ait Alembey mahallesindeki evde yaptığı tadilatın keşfi Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân el-Hâc Hasan Bey b. Mehmed nâm bevvâb-ı sultânî meclis-i şer‘de işbu hâmilü’l-kitâb Saliha bt. Ahmed nâm hatun mahzarında ikrâr ve takrîr-i kelâm edip evkāf-ı mezbûreden olup mahrûse-i İstanbul’da Alembey mahallesinde vâki‘ bir tarafdan Mustafa Efendi b. Haydar mülkü ile bir tarafdan Fahri Hatun bt. ( ) Vakfı ile bir tarafı tarîk-i âm ile mahdûd olup iki tahtânî evi ve bir zulleyi ve bir kenîfi ve muhavvatayı müştemil olan menzil bundan akdem mütevellî-i sâbık Hamza Bey b. Abdullah nâm bevvâb-ı sultânî yevmî iki akçe icâre-i müeccele ile mezbûre Saliha’ya îcâr edip ve kendi mâlıyla her ne binâ ederse vakıfda icâre-i müecceli olmak üzere izin vermeğin ol dahi menzil-i mezbûrun sakfını ve bazı duvarlarını kendi mâlından [53b] ta‘mîr edip hâlâ kıbel-i şer‘den mi‘mâr ve ehl-i vukūf Müslimânlar ile menzil-i mezbûrun üzerine varılıp keşf olundukda cümle beş bin akçe harcı zuhûr edip bin akçe dahi bana nakd vermeğin cem‘an mezbûre Saliha’nın menzil-i mezbûrda altı bin akçe icâre-i mu‘accelesi oldu. Min-ba‘d menzil-i mezbûrun icâre-i müeccele-i mu‘ayyenesini mâh be-mâh cânib-i vakfa edâ edip sâir emsâli gibi mutasarrıfe olsun dedikde mütevellî-i mezbûrun ber-vech-i meşrûh cârî olan ikrârını müste’cire-i mezbûre Saliha Hatun dahi vicâhen tasdîk ve şifâhen tahkīk ettikde mâ-hüve’l-vâkı‘ bi’t-taleb ketb olundu. Tahrîren fî-evâhiri Rebî‘i’l-evvel li-sene erba‘a ve ışrîn ve elf. Şühûdü’l-hâl: Mustafa Efendi b. Haydar el-hatîb, Ali Çelebi b. Halil, Hüseyin Çelebi b. Ömer, Ferhad Bey b. Abdullah ve gayruhüm.