Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 220 Hüküm no: 157 Orijinal metin no: [54a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Ahmed Ağa b. Abdülmennan’ın Haremeyn Evkafı’na ait Hüseyinağa mahallesinde evi kiraladığı Mahmiye-i İstanbul’da Haremeyn-i Şerîfeyn Evkāfı’na bi’l-fi‘il mütevellî olan Hasan Bey b. Mehmed nâm bevvâb meclis-i şer‘de işbu sâhibü’l-kitâb zahrü’l-a‘yân Hafız Ahmed Ağa b. Abdülmennan mahzarında ikrâr ve takrîr-i kelâm edip evkāf-ı mezbûreden mahmiye-i mezbûre[de] Küçük Ayasofya kurbünde Hüseyinağa mahallesinde vâki‘ bir cânibi vakf-ı mezbûr ve bir cânibi Ömer Ağa verese[si] mülkleri ile ve bir cânibi Helvacı Mescidi imâmına vakfolan menzil ve bir cânibi tarîk-i âm ile mahdûd olup iki bâb tahtânî evi ve sofayı ve mahzeni ve tahtınd[a] dahlîzi ve kilârı ve bir bâb fevkānî odayı ve bir ahırı ve bi’r-i mâyı ve cüneyneyi ve kenîfi müştemil olan menzilin yevmî on akçe ecr-i mislidir deyu mi‘mâr ve sâir ehl-i vukūf ittifâk eylediklerine binâen ben dahi menzil-i mezbûr içinde kendi mâlıyla her ne mikdâr binâ ihdâs ederse cümlesi vakfa teberru‘ etmek üzere târîh[-i kitâbdan] yevmî on akçe ecr-i misli icâre-i müeccele ile mûmâ-ileyh Hafız Ahmed Ağa’ya tevliyetim hasebi ile îcâr eyledim ol dahi vech-i meşrûh üzere istîcâr ve kabûl ettikden sonra gıbbe’t-tasdîk. Şühûdü’l-hâl: Hüseyin Çelebi b. Ömer, Ali Çelebi b. Halil el-mi‘mâr, Mahmud Çelebi b. ( ), Receb b. Abdülmennan, Mehmed b. Yusuf, Ahmed b. Mahmud ve gayruhüm.