Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 221 Hüküm no: 158 Orijinal metin no: [54a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Bey b. Mustafa’nın oturduğu Haremeyn Evkafı’na ait Emin Sinan mahallesindeki evde yaptığı tadilatın keşfi Haremeyn-i Şerîfeyn Evkāfı’ndan olup mahmiye-i İstanbul’da Emin Sinan mahallesinde vâki‘ lede’l-cîrân ma‘lûmü’l-hudûd olan menzilin icâre-i mu‘accele ve yevmî ikişer akçe icâre-i müeccele ile müste’ciri olan işbu sâhibü’l-kitâb Ali Bey b. Mustafa nâm kilârî meclis-i şer‘-i şerîfe gelip takrîr-i kelâm edip bundan akdem menzil-i merkūm bi’l-fi‘il evkāf-ı mezbûre mütevellîsi olan Hasan Bey b. Mehmed nâm bevvâb-ı sultânî içinde kendi mâlımla her ne binâ ihdâs edersem ba‘dehû icâre-i mu‘acceleme mahsûb olmağa izin verip îcâr etmeğin ben dahi ma‘rifet-i mütevellî-i mezbûr ve izn-i şer‘le menzil-i merkūmun kendi mâlımla müceddeden bir matbah ve üzerinde bir bâb fevkānî oda ve müceddeden bir taş duvar binâ ve ihdâs edip sakıflarını ve kenîflerini ve sofasının tavanını ve nerdübânlarını ve bazı yerlerini dahi kendi mâlımla câ be-câ ta‘mîr ve termîm edip otuz beş bin yedi yüze elli akçe harc u sarf etmişidim hâlâ kıbel-i şer‘den üzerine varılıp meblağ-ı mezbûra tahammülü var mıdır keşf ve müşâhede olunup ba‘de’l-keşf vech-i mesfûr üzere meblağ-ı mezbûr cânib-i vakıfda icâre-i mu‘accelem olmağa izin taleb ederim dedikde savb-ı şer‘den Mevlânâ Mustafa Efendi ve hâssa mi‘mârlardan üstâd Ali b. Halil irsâl olunup zeyl-i kitâbda isimleri mastûr olan Müslimîn ile menzil-i mezbûrun üzerine varılıp hakīkat-ı hâl mütevellî-i merkūm mahzarında keşf ve müşâhede olundukda fi’l-hakīka vech-i meşrûh üzere mevâzi‘-i mezkûre tecdîd ve ta‘mîr olunmuş bulunmağın bu cümleden zikr olunan matbah ve odanın cümle tuğla döşeme ve dolma duvar ve pencere ve camları ve sakfı ve kiremidi ve kireç ve horasani ve sâir kerestesinin on beş bin akçeye ve tûlen yirmi beş ve kadden sekiz bi-hesâb-ı şatrancî iki yüz zirâ‘ taş duvarın her zirâ‘ı derzi ile yetmiş akçeden on dört bin akçeye ve zikr olunan odaya muttasıl tûlen on iki kadden iki buçuk bi-hesâb-ı şatrancî yirmi beş zirâ‘ tuğla dolma havâle duvarının kireci ile her zirâ‘ı <> otuz akçeden yedi yüz elli akçeye ve kenîfinin müceddeden binâ olunmuş bir taş kârîzinin üç bin akçeye ve sakfının akdarmasının ve kiremid ve kireç ve pedavrasının ve turresinin tavanının nerdübânlarının ve sâir kerestesinin üç bin akçeye ki cem‘an otuz beş bin yedi yüz elli akçeye <>olur bu cümle mesârif-i mezkûrenin üstâdiyye ve ırgadiyye ve hammâliyyesiyle meblağ-ı mezbûr otuz beş bin yedi yüz elli akçeye tahammülü vardır deyu mi‘mâr-ı mezbûr ve sâir ehl-i vukūf Müslimîn ittifâk ettiklerinde mevlânâ-yı mezbûr mahallinde tahrîr edip ba‘dehû meclis-i şer‘a gelip haber vermeğin mâ-vaka‘a bi’t-taleb ketb olundu. Fî-evâili şehri Ramazâni’l-mübârek min-şühûri sene erba‘a ve ışrîn ve elf. Şühûdü’l-hâl: Ferhad Bey b. Abdullah el-bevvâb el-câbî li-Evkāfi’l-Haremeyn, Ahmed Çelebi b. Ali el-bevvâb, Mehmed Çelebi b. Mustafa, İbrahim Bey b. ( ) el-bevvâb, Mustafa b. Ali ve gayruhüm.