Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 233 Hüküm no: 170 Orijinal metin no: [57b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtib Mehmed Efendi’nin Kasımpaşa’da Ali Reis tarafından vakfedilen bahçeye ve Havvâ’nın vakfiyet üzere zabtına müdahalesinin engellenmesi Vâkıf-ı âti’z-zikrin bint-i sulbiyesi olup vakf-ı âti’l-beyâna kıbel-i şer‘-i şerîfden mütevellî nasb olunan Havvâ Hatun’un zevci ve husûs-ı âti’z-zikrde da‘vâya vekîl olup nehc-i şer‘î üzere vekâleti sâbite olan Ali b. Mehmed nâm kimesne mahfil-i kazâda işbu kitâbda tahrîr olunan menzil ile bahçeye mülkiyet üzere vâzı‘ü’l-yed olduğu sâbit olan mufahhar erbâbü’t-tahrîr ve’l-kalem Mehmed Efendi b. Süleyman tarafından husûs-ı âti’z-zikrde husûmete vekîl olup Hamza b. Hüseyin ve Receb b. Ahmed şehâdetleri ile vekâleti sâbite olan üstâd Hasan b. Hüseyin mahzarında takrîr-i kelâm ve ta‘bîr ani’l-merâm edip medîne-i Galata hâricinde Kasımpaşa’da es-Seyyid Ali Çelebi Mescidi mahallesinde vâki‘ bir tarafı Şerife nâm hatunun Medîne-i Münevvere’ye vakfı ve bir tarafı Meremmâtcı Ali’ye ve bir tarafı İplikçi Mustafa [58a] mülkü ile ve bir tarafı tarîk-i âm ile mahdûd olan menzil ve ba‘dehû dâhil-i vakfolan Mustafa menzili bahçesi ile ve bir tarafı makābir-i Müslimîne muttasıl olan tarîk-i âm ile ve bir tarafı Badullah b. Mehmed mülkü ile ve bir tarafı tarîk-i âm ile mahdûd olan bahçe müvekkilem-i mezbûre Havvâ’nın babası Ali Reis’in mülkleri olup hâl-i sıhhatinde bin üç senesi Receb-i evvelinde zikr olunan menzil ile bahçeyi silk-i mülkünde olduğu hâlde mezbûr Ali Reis b. Sinan cemî‘-i tevâbi‘ ve levâhıkı ile hasbeten lillâhi te‘âlâ vakfedip tasarrufunu evvelen kendi nefsine ba‘dehû evlâdına ve evlâd-ı evlâdına ve evlâd-ı evlâd-ı evlâd-ı evlâd-ı evlâdına ile’l-inkırâz şart edip ba‘de’l-inkırâz Medîne-i Münevvere’ye vakfola deyu teslîm ile’l-mütevellî ve hâkimü’ş-şer‘a tescîl ettirip vakf-ı lâzım-ı müseccel iken müvekkil-i merkūm Kâtib Mehmed Efendi zikr olunan menzil ile bahçeye bi gayr-ı vech-i şer‘î vaz‘-ı yed edip mütevellîsi olan müvekkilem-i merkūme Havvâ’nın vakfiyet üzere zabtına ve tasarrufuna mâni‘ olur şer‘le ihkāk-ı hak olunmasın taleb ederim mazmûnu min-külli’l-vücûh takrîrine muvâfık sûret-i sicil ibrâz ettikde vekîl-i zi’l-yed olan merkūm Hasan zikr olunan menzil ile bahçenin vakfiyetlerin inkâr etmeğin gıbbe talebi’l-beyyine udûl-i Müslimînden olup zikri sâbık eden mahalle sâkinlerinden olan Yusuf b. Ali ve Hüseyin b. Abdullah en-neccâr li-ecli’ş-şehâde hâzırân olup fi’l-vâki‘ mütevelliye olan mezbûre Havvâ’nın babası merkūm Ali Reis hâl-i sıhhatinde târîh-i mezbûrda zikr olunan hudûd ile mahdûd olan menzil ve bahçeyi mülkünde olduğu hâlde bast olan minvâl üzere evvelen kendiye ba‘dehû evlâdına ve evlâd-ı evlâdına evlâdına ile’l-inkırâz ve ba‘de’l-inkırâz Medîne-i Münevvere’ye vakfedip teslîm ile’l-mütevellî ve tescîl-i şer‘î ettirdip vakf-ı lâzım-ı müseccel olmuşdur hâlâ vakf-ı lâzımdır deyu edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebi ile zikr olunan menzil ile bahçenin vakf-ı lâzım olduklarına hükmolundu. Hurrire fî-evâili Saferi’l-hayr li-sene hamse ve ışrîn ve elf. Şühûdü’l-hâl: El-Hâc Mehmed b. Ali, Mehmed b. ( ) Reis, el-Hâc Abbas b. İbrahim, Ahmed Çelebi b. Halil, Kâtib Yusuf b. Ferhad, Himmet Reis b. Maksud, Mehmed b. Süleyman Reis ve gayruhüm.