Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 231 Hüküm no: 169 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasımpaşa’da sakin Ali Reis b. Sinan’ın Haremeyn Evkafı’na vakfettiği eve ve bahçeye ait vakfiyesi ve bunlara Katib Mehmed Efendi’nin yaptığı müdahalenin engellenmesi Mâ-zübire fî hâzihi’l-vesîkati’ş-şer‘iyye ve’s-sahîfeti’l-enîkati’l-mer‘iyye min-asli’l-vakf li-şerâ’itihi ve’l-habsi ve zevâbıtıhi sahha ledeyye ve subbite beyne yedeyye ve innî kadaytü bi-sıhhatihî [ve] luzûmihî âlimen bi’l-hilâfi beyne’l-eimmeti’l-eslâf mürâ‘iyen yecibü i‘tibâruhû fi’l-hükmi ve’l-kazâi Harrerehü’l-abdü’l-fakīr Mehmed b. Yusuf el-müvellâ-hilâfeten bi-mahkemeti Kasımpaşa bi-medîneti Galata el-mahmiye -ufiye anhümâ ve gufira lehümâ- Tazammene mâ-yu‘teber inde sübûtihî ale’l-nehci’l-mu‘teber Harerehu’l-fakīr Kemaleddin b. Mehmed b. Ahmed el-Kādî bi-asâkiri Rumeli el-ma‘mûre -ufiye anhümâ ve gufire lehümâ- Nukile hâze min-asli’l-vakfi’l-mezbûr. Nemekahü’l-fakīru Mehmed b. Süleyman el-müvellâ bi-Kasımpaşa hâlâ -ufiye anhümâ- Elhamdülillâhi ve’s-salâtü alâ-nebiyyihî Muhammed ve âlihi ecma‘în ve ba‘d işbu kitâb-ı sıhhat-nisâbın tahrîr ve inşâsına bâ‘is oldur ki mahmiye-i Galata hâricinde Kasımpaşa kasabasında vâki‘ es-Seyyid Ali mahallesinde sâkin Ali Reis b. Sinan meclis-i şer‘de vakf-ı âti’l-beyâna li ecli’t-tescîl mütevellî nasb ve ta‘yîn ettiği es-Seyyid Ali Çelebi b. es-Seyyid Ahmed mahzarında ikrâr-ı sahîh edip mahmiye-i mezbûrede Ca‘fer Reis b. Abdullah’dan yirmi bin akçeye iştirâ eylediğim mülk menzilimin bir cânibi yine Nefîse Hatun’un Medîne-i Münevvere’ye vakfettiği menzile ve bir cânibi Meremmâtcı Ali menziline ve bir cânibi İplikçi Mustafa mülküne ve bir cânibi tarîk-i âm ile mahdûd iki bâb tahtânî ve iki bâb fevkānî odalar ve önü sundurmayı ve kilârı ve bi’r-i mâyı ve yine menzil-i mezbûrun hudûdu dâhilinde kendi mâlımla iki tahtânî ve iki fevkānî odalar ve bir mahbesi ve bir âhar kilârı ve iki tahta döşemeli sofaları ve dahlîzi müştemil menzil ki cem‘an sekiz bâb odalardır ve yine menzil-i mezbûra muttasıl tarafeyni makābir-i Müslimîne ve bir cânibi Badullah menziline ve bir tarafı tarîk-i âm ile mahdûd olup tasarrufumda olan bahçemi taleben li marzâti’l-lâhî te‘âlâ vakf-ı sahîh ile vakfeyledim hayâtda oldukça kendim sâkin olup mutasarrıf olam ba‘de vefâtihî evlâdım ve evlâd-ı evlâdım neslen ba‘de nesl ve karnen ba‘de karn ve ba‘de’l-inkırâz Medîne-i Münevvere’ye vakfolup ve bahçe-i mezbûreyi yevmî bir akçe ile îcâr olunup icâresinden vakf-ı mezbûr ta‘mîr ve termîm oluna ve her kim Haremeyn-i Şerîfeyn mütevellîsi olursa bahçe mahsûlünden beher sene altmış akçe ile nâzır ola, menzil-i mezkûru mütevellî-i sâlifü’z-zikre tahliyye ve teslîm eyledim ol dahi kabz ve tesellüm eyleyip sâir evkāf mütevellîleri gibi tasarruf eyledi dedikde gıbbe’t-tasdîki’ş-şer‘î vakfeylediğim evlerin meremmâtı zuhûr ettikçe ve bahçe havlusu meremmâtına yine bahçe mahsûlünden kifâyet mikdârı [ile] ta‘mîr ve termîm oluna ve mütevellî-i mezbûr Seyyid Ali fevtinden ve kendi vefâtımdan sonra evlâdımdan kim sâkin olursa her kimi dilerse mütevellî nasb ve ta‘yîn eyleye ve vakf-ı sâlüfü’z-zikr ma‘lûmü’l-hudûd menzil ve hadîkayı teslîm-i mütevellî eyledim dedikde mütevellî-i mezbûr dahi vâkıf-ı müşârun-ileyhin kelâmını tahkīk ve makālini tasdîk edip alâ-kavli men cevvezehû sıhhat ve lüzûmuna hüküm taleb ettirsin deyicek vakf-ı mezbûrun resm-i ma‘lûm ve tarz-ı mersûm üzere hükm-i sahîh ile sıhhat ve lüzûmuna hükmolunup mahkûmün-bih olmağla min-ba‘d nakz ve nakzına mecâl muhâl ve tağyîr ve tebdîline imkân mümteni‘ü’l-ihtimâl oldu. Tahrîren fî-evâili Recebi’l-mürecceb sene selâse ve elf el-hicriyye. Şühûdü’l-hâl: Mehmed b. Mehmed el-imâm, Yusuf b. Mahmud el-müezzin, Mustafa b. Süleyman, Murad b. Abdullah, Mustafa b. ( ), Süleyman b. İbrahim, Mehmed Reis b. Abdullah, Yusuf b. Ali, Hüseyin b. Abdullah, Ahmed b. Yusuf, Hacı Ali b. Ahmed, Hüseyin b. Abdullah, Murad Reis, Himmet Reis, Receb b. Ahmed ve gayruhüm.