Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 243 Hüküm no: 181 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’na ait Sultan Bayezid Camii yakınındaki hamamın Mustafa b. Abdünnebi’ye kiralandığı Mütevellî-i merkūm Hasan Bey meclis-i şer‘de bâ‘isü’l-kitâb Mustafa b. Abdülgani mahzarında takrîr-i merâm edip vakf-ı mezbûrun mahmiye-i İstanbul’da Sultan Bayezid Hân Câmi‘-i şerîfi kurbünde vâki‘ vākıfına intimâ ile tahdîd ve tavsîfden müstağnî ferd hamâm bundan akdem müddet-i icâresi tamâm olmağın îcârı lâzım geldikde tâlibîne arz olunup ragabât-ı nâs münkatı‘a oldukdan sonra meremmât ile üç bin altı yüz akçede mezbûr Mustafa’nın üzerinde karâr edip ziyâde ile tâlib-i âhar zuhûr etmemeğin ben dahi hamâm-ı mezbûru târîh-i kitâbdan bir sene tamâmına varınca mâh be-mâh kıstü’l-yevmini haklaşmak üzere meremmâtı ile üç bin altı yüz akçeye müşârun-ileyh Mustafa’ya tevliyetim hasebi ile îcâr eyledim ol dahi vech-i meşrûh üzere istîcar ve kabûl eyledi dedikde gıbbe’t-tasdîk meblağ-ı mezbûrun cümlesine Ali Bey b. Yusuf nâm kimesne tarafından emr ve kabûlü hâviye kefâletle kefîl olmağın mâ-vaka‘a bi’t-taleb sebt olundu. Fî-gurreti Saferi’l-hayr li-sene hamse ve ışrîn ve elf. Şühûdü’l-hâl: İshak Efendi b. ( ) Mütevellî-i Ayasofya, Eyüb b. ( ) el-bevvâb, Ali Çelebi b. ( ) el-mi‘mâr, Mustafa Çelebi b. ( ) el-kâtib ve gayruhüm.