Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 242 Hüküm no: 180 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arpacızâde Mehmed Çelebi’nin ölümünden sonra gelirini Haremeyn Evkafı’na gönderilmek üzere vakfettiği ev Mütevellî-i merkūm meclis-i şer‘de işbu sâhibü’l-kitâb Piyale b. Abdullah nâm kimesne mahzarında ikrâr-ı tâm ve takrîr-i kelâm edip mahmiye-i merkūmede Zeyrek Câmi‘-i şerîfi kurbünde vâki‘ bir tarafı Bıçakcı Mustafa Bey b. ( ) <> vakfına ve bir tarafı vâkıf-ı âti’z-zikrin mülküne ve tarafeyni tarîk-i âmma müntehî dâhiliyye ve hâriciyye muhavvateyni muhtevî olup muhavvata-i dâhiliyyesi bir bâb fevkānî ve bir tahtânî odayı ve kenîfi ve muhavvata-i hâriciyyesi iki bâb fevkānî odayı ve bir kilârı ve ahırı ve kenîfi müştemil olan menzili mahalle-i merkūmede sâkin iken bundan akdem vefât edip Arpacızâde demekle ma‘rûf Mehmed Çelebi b. ( ) nâm müteveffâ hâl-i hayâtında ve kemâl-i sıhhatinde mülkü iken cümle tevâbi‘ ve levâhıkıyla evvelen kendi nefsine ba‘dehû Medîne-i Münevvere fukarâsına vakfetmişidi. El-hâletü hâzihî merkūm Mehmed Çelebi vefât edip şartı üzere menzil-i merkūm fukarâ-i mezbûreye âid olmağla îcârı lâzım geldikde tâlibîne arz olunup ragabât-ı nâs münkatı‘ oldukdan sonra on üç bin yüz akçe icâre-i mu‘accele ve yevmî üç akçe icâre-i müeccele ile merkūm Piyale’nin üzerinde karâr edip ziyâde ile tâlib-i âhar zuhûr etmemeğin ben dahi menzil-i merkūmu vech-i meşrûh üzere târîh-i kitâbdan on üç bin yüz akçe icâre-i mu‘accele ve yevmî üçer akçe hesâbı üzere beher şehr doksan akçe icâre-i müeccele ile merkūm Piyale’ye tevliyetim üzere îcâr ve teslîm eyledim ol dahi vech-i meşrûh üzere istîcâr ve kabûl ettikden sonra icâre-i mu‘accelesi olan meblağ-ı mezbûr on üç bin yüz akçeyi <> merkūm Piyale yedinden vakıf için bi’t-tamâm alıp kabz eyledim ve menzil-i merkūmun lâzım gelen ta‘mîr ve termîmi ve müceddeden binâsını kendi mâlından edip müceddeden ihdâs olunan ebniyesi ve sâir meremmât-ı cüz’iyye ve külliyyesi asl-ı vakfa mülhak olup harc u sarf <> ettiği akçe cânib-i vakfın icâre-i mu‘accelesine mahsûb olmak üzere izin dahi verdim ba‘de’l-yevm icâre-i müeccele-i mezbûresini mâh be-mâh cânib-i vakfa edâ edip sâir emsâli gibi mutasarrıf olsun dedikde gıbbe’t-tasdîk mâ-vaka‘a kayd şud. Fî-evâsıtı Rebî‘i’l-evvel li-sene hamse ve ışrîn ve elf. Şühûdü’l-hâl: Ömer Bey b. ( ) Korucu, Kemal b. Mahmud el-imâm, Ali b. Mustafa el-müezzin, Mustafa b. ( ) el-müezzin, Ömer Ağa b. ( ), Vildan b. Abdullah, Keyvan b. Abdullah, Mehmed Çelebi b. Burusevî ve gayruhüm.