Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 244 Hüküm no: 183 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mevlana Fenarî mahallesinde Korucu Mustafa Beşe b. Abdullah’ın mülkünün vakfiyesi Mâ-fîhî mine’l-vakfi ve’ş-şurûti sebete indî alâ-nehci’l-mebsût fe hakemtü bi-sıhhatihî ve lüzûmihî fî-husûsihî ve umûmihî âlimen bi-hilâfi eimmeti’d-dîn rıdvânullâhi sübhânehû aleyhim ecma‘în. Ketebehü’l-fakīr ileyhi sübhânehû Hasan b. Musa el-Kassâmü’l-askerî bi-medîneti Kostantıniyyeti’l-mahmiye -afa’llâhü te‘âlâ anhümâ- Elhamdülillâhi’l-vâkıfı ale’s-serâire’l-muttali‘ alâ-hafâyâe’d-damâyir ve’s-salâtü ve’s-selâmü alâ-men-erselehâ bi’l-âyâti’l-beyyinâti ve eyyedehû bi’l-berâhini’l-nâtıkât ve’l-mu‘cizât Muhammed sallallâhu aleyhi ve sellem ve alâ-âlî ve ashâbihi zevi’l-mükerremmât ve alâ-ehli beytihi ve ezvâcihi’t-tâhirât ammâ ba‘d bu hurûf-ı müşgîn nikāb ve sıhhat nisâbın tahrîr ve inşâsına bâdi ve tertîb ve imlâsına sâ‘î budur ki; Çûn dünyânın ni‘meti zâyil ve mukīmi zâhildir. Binâen alâ-zâlik “ve i‘tinâen bi-mâ zükire hünâlike” meclis-i şer‘-i şerîfde tâlib-i hayrât Dergâh-ı âlî yeniçerilerinden elli dördüncü bölükde ta‘lîmhânecilerden Korucu Mustafa Beşe b. Abdullah er-râcil mahfil-i kazâda vakf-ı âtiye li-ecli’t-tescîl mütevellî nasb ve ta‘yîn eylediği Keçecilerden Mehmed Beşe b. Abdullah er-râcil mahzarında ikrâr-ı tav‘î edip mahmiye-i İstanbul’da merhûm Mevlânâ Fenarî mahallesinde vâki‘ bir cânibi tarîk-i âm ve bir cânibi Molla Şeref vakfı odalarına ve bir cânibi Katırzâde evlerine ve bir cânibi Kerim Çelebi ve Fâtıma menziliyle mahdûd mülk evlerimi ki içerisinde tahtânî ve fevkānî bir ocaklı ve bir ocaklı bir odası ve bi’r-i mâyı ve kenîfi ve eşcâr-ı müsmire ve gayr-i müsmireyi müştemil ve taşrasında selâmlığı ve ahırı ve kenîfi müştemil mülkümden ihrâc ve vakf-ı sahîh ile vakfedip şöyle şart eyledim ki mâdâm ki hayâtda oldukca kendim sâkin olup vefâtımdan sonra evlâdıma ve evlâd-ı evlâd-ı evlâdıma ve evlâd-ı evlâd-ı evlâdıma ba‘de’l-inkırâz utekāmdan Piyale ve Rıdvan ve Fâtıma ve Yasemin’e ve evlâdlarına ve ba‘de’l-inkırâz Medîne-i Münevvere’ye vakfeyledim ve şart eyledim ki ta‘mîr ve termîmi vâki‘ oldukda içinde sâkin kendi mâllarından ta‘mîr ve termîm edeler ve ta‘mîr ve termîme kādir olmayıp muhâlefet edeni mütevellî ihrâc ve âhara îcâr edip icâresinden ta‘mîr oluna ve mütevellî-i mezbûr fevt oldukda evkāf müfettişi dilediğin bir müstakīm kimesneyi mütevellî nasb eyleye ve Haremeyn-i Şerîfeyn mütevellîsi üzerine hasbî nâzır ola dedikde mütevellî-i mezbûr dahi vâkıf-ı müşârun-ileyhin kelâmını tahkīk ve makālini tasdîk edip alâ-kavli min-cevvezihi sıhhat ve lüzûmuna hükm taleb ederim deyicek vakf-ı mezbûrun resm-i ma‘lûm ve tarz-ı mersûm üzere hükm-i sahîh-i şer‘î ile sıhhat ve lüzûmuna hükmolunup mahkûmün-bih olmağla min-ba‘d nakz ve nakzına mecâl muhâl ve tağyîr ve tebdîline imkân mümteni‘ü’l-ihtimâl oldu “Fe-men‘ beddelehû ba‘de mâ-semi‘ahu fe-innemâ ismühû ale’llezîne yübeddilûnehû innellâhe semî‘un alîm” ve ecrü’l-vâkıf ale’l-hayyi’l-cevâdi’l-kerîm. Cerâ zâlike ve hurrire fî-evâhiri Zilka‘deti’ş-şerîfe li-sene ışrîn ve elf. Şühûdü’l-hâl: İbrahim Efendi el-imâm bi-Câmi‘-i Kilise, Kavuncu Hasan Bey b. Abdullah, Fahrü’l-akrân Muslihiddin Ağa, Fahrü’l-küttâb Solaklar Kâtibi Muslu Çelebi, Korucu Ferhad Beşe er-râcil, Medenîzâde Mehmed Çelebi, Korucu Yusuf Beşe er-râcil, Mehmed Beşe er-râcil, Mehmed Çavuş, İbrahim Efendi el-imâm-ı Câmi‘-i Molla Şeref, Osman Bey b. Abdullah, Haydar Halîfe b. Abdullah el-müezzin, Ferhad Beşe er-râcil, Fahrü’l-küttâb Ahmed b. Yusuf er-râcil, diğer Kâtib Ahmed Çelebi er-râcil, Mustafa Beşe el-mütekā‘id ve gayruhüm.