Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 254 Hüküm no: 193 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa b. Abdülmennan’ın Haremeyn Vakfı’nın evi kiralaması Mütevellî-i merkūm meclis-i şer‘de hâlâ taşra Hazînedârbaşı olan Hasan Ağa b. Abdülmennan mahzarında takrîr-i kelâm edip vakf-ı mezbûrun Sultan Mehmed Hân Câmi‘-i şerîfi kurbünde Harrât Kemal mahallesinde vâki‘ üç bâb tahtânî beyti ve ıstablı ve bi’r-i mâ ve cüneyneyi ve üç gurfe ve zulleyi ve iki kenîfi ve fırın ve mahzen ve muhavvatayı muhtevî olup bir tarafdan Murad Subaşı b. Abdullah mülkü ve bir tarafdan merhûn Sinan Çelebi vakfı ve bir tarafdan merhûm Mahmud Çelebi vakfı ve bir tarafdan tarîk-i âm ile mahdûd olan menzili bi-cümleti’t-tevâbi‘ ve’l-levâhık müşârun-ileyh Hasan Ağa hazretlerine târîh-i kitâb şehri gurresinde beher şehr doksan akçe icâre-i müeccele ve sekiz bin akçe icâre-i mu‘accele ve lâzım gelen meremmât-ı külliyye ve cüz’iyye ve müceddeden binâsı mu‘accelesine mahsûb olmak üzere kendi mâlından etmek <<üzere>> edip mâh be-mâh kıstü’l-yevmini icâre-i mu‘ayyene-i mezbûresin cânib-i vakfa edâ etmek üzere tevliyetim hasebi ile îcâr ve teslîm eyledim ol dahi istîcâr ve kabûl ettikdikden sonra meblağ-ı mezbûr sekiz bin akçesini yedinden bi’t-tamâm alıp kabz eyledim ba‘de’l-yevm keyfe mâ yeşâ ve yahtâr emsâli gibi mutasarrıf olsun dedikde gıbbe’t-tasdîki’ş-şer‘î mâ-vaka‘a sebt olundu. Fî-gurreti Zilhicceti’ş-şerîfe min-şühûri sene hamse ve ışrîn ve elf. Şühûdü’l-hâl: es-Seyyid Mazhar Efendi b. Hüseyin el-kâtib-i Dîvân-ı âlî, Ramazan Efendi b. Muharrem el-imâm bi-mahalleti’l-mezbûre, Receb Halîfe b. Şaban el-müezzin bi-mahalleti’l-mezbûre, İbrahim Bey b. ( ) el-hayyât, Mustafa Bey b. Ahmed el-bevvâb, Abdullah b. Emrullah, el-Hâc Ferhad Bey b. ( ), Hüseyin Çelebi b. Ömer, Ali Çelebi b. Mi‘mâr ve gayruhüm.