Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 255 Hüküm no: 195 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’ndan olup kiracısı Musa Ağa b. Abdülmennan tarafından tamir ettirilen eve yapılan masrafın tesbiti Mahmiye-i İstanbul’da Haremeyn-i Şerîfeyn Evkāfı’ndan Kabasakal mahallesinde vâki‘ lede’l-cîrân ma‘lûmü’l-hudûd menzilin icâre-i mu‘accele ve beher şehr ve ecr-i mislinden ziyâde müeccele ile hâlâ müste’ciri olan Musa Ağa b. Abdülmennan vakf-ı mezbûre mütevellîsi mahzarında takrîr-i kelâm edip bundan akdem menzil-i mezbûrun bazı yerleri câ be-câ harâba müşrif olup meremmâta muhtâc oldukda kendi mâlımla ta‘mîr edip ba‘dehû kıymeti icâre-i mu‘acceleye mahsûb olmayıp müeccelesinden bir buçuk akçesi hatt olunmak üzere izn-i şer‘ ve ma‘rifet-i mütevellî-i mezbûr ile meremmât etmişidim. Hâlâ kıbel-i şer‘den üzerine varılıp ne mikdâr akçeye tahammülü vardır keşf ve tahrîr olunması matlûbumdur dedikde cânib-i şer‘-i şerîfden Mevlânâ Hüseyin Efendi ve Hâssa mi‘mârlarından Üstâd Ali b. Halil irsâl olunup zeyl-i kitâbda mastûretü’l-esâmî olan Müslimîn ile mahall-i mezbûra varılıp keşf ve müşâhede olundukda fi’l-hakīka menzil-i mesfûrun bazı taş duvarı ve sakfları ve ocakları ve tahta pûşları ve dahlîzi ve kârîzi meremmât olunmuş bulunup bu cümleye sarf olunan taş ve kireç ve horasaninin ve neccâriyye ve ırgadiyye ve hammâliyeleriyle cem‘an ba‘de külli hesâb yirmi bin akçeye tahammülü ve müeccelesinin bir buçuk akçesi ecr-i mislinden ziyâdedir deyu mimâr-ı mezbûr ve sâir ehl-i vukūf ittifâk ettiklerini Mevlânâ-yı mezbûr mahallesinde takrîr edip ba‘dehû meclis-i şer‘a gelip haber vermeğin ber-vech-i muharrer bir buçuk akçesi hatt olsun bâkī kalan iki buçuk menzil-i merkūmun ecr-i mislidir deyu sikāt haber vermeğin mâ-hüve’l-vukū‘ ketb olundu. Fî-evâili şehri Şevvâl sene hamse ve ışrîn ve elf. Şühûdü’l-hâl: Hasan Çelebi b. Mehmed, Yusuf Ağa b. Abdülmennan, el-Hâc Ali b. ( ), Mehmed Bey b. Abdullah el-bevvâb, Mehmed Çelebi b. Pervâne, Süleyman Çavuş b. ( ), Mustafa Ağa b. ( ) ez-zevvâk.