Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 256 Hüküm no: 196 Orijinal metin no: [65b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’ndan olan evin Mustafa b. Mehmed tarafından tamir edilmek şartıyla kiralanması Mahmiye-i İstanbul’da Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân el-Hâc Hasan Bey b. Mehmed nâm bevvâb-ı sultânî meclis-i şer‘-i kavîmde bâ‘isü’l-kitâb Mustafa b. Mehmed nâm kimesne mahzarında bi’t-tevliye ikrâr-ı tâm ve takrîr-i kelâm edip mahmiye-i merkūme mahallâtından Fethiye Câmi‘-i şerîfi kurbünde merhûm Kâtib Muslihiddin mahallesinde vâki‘ tûlen ve arzen hesâb-ı şatrancî üzere bin dört yüz zirâ‘ arsa üzerinde mebnî iki bâb fevkānî ve bir bâb tahtânî odayı ve üzerinde bir bâb küçük odayı ve bi’r-i mâyı ve sofayı ve kenîfi ve bahçeyi muhtevî olup bir cânibi bazen Fâtıma Hatun bt. ( ) mülkü ve bazen mahalle-i merkūme imâmına mevkūf menzil ve bir cânibi Mahmud Subaşı mülkü ve bir cânibi İsmail Çelebi b. ( ) mülkü ve bir cânibi tarîk-i âm ile mahdûd olan menzili bundan akdem mahalle-i merkūmede vefât eden merhûm Na’lband Hasan b. ( ) nâm kimesne hâl-i sıhhatinde mülkü iken evvelâ kendi nefsine ba‘dehû evlâdına ve evlâd-ı evlâd-ı evlâdına ve ba‘de’l-inkırâz fukarâ-i Haremeyn’e vakf edip hâlâ merkūm Hasan ve evlâdı münkarız olmağla ber-mûceb-i şartı vâkıf-ı mezbûr menzil-i mezbûr fukarâ-i Haremeyn’e âid olmağla îcârı lâzım geldikde tâlibîne arz olunup ragabât-ı nâs münkatı‘a oldukdan sonra mesfûr Mustafa iki bin akçe mu‘accelesi ve yevmî iki akçe müeccele ve mu‘accelesine mahsûb olmak üzere lâzım gelen meremmât-ı külliyye ve cüz’iyyesi ve müceddeden binâsını kendi mâlından etmek üzere istîcâra tâlib olup bir akçe ziyâde ile tâlib-i âhar zuhûr etmeyip vech-i meşrûh üzere îcâr vakfa enfa‘ müşâhed olmağın ben dahi tevliyetim hasebiyle menzil-i mezbûru bi-cümleti’t-tevâbi‘ târîh-i kitâbdan merkūm Mustafa’ya iki bin akçe icâre-i mu‘accele ve yevmî ikişer akçe hesâbı üzere beher şehr altmış akçe icâre-i müeccele ile îcâr ve teslîm eyledim ol dahi vech-i meşrûh üzere istîcâr ve kabûl ettikden sonra icâre-i mu‘accelesi olan meblağ-ı mezbûr iki bin fıddî Osmânî nakd-i râyic fi’l-vakt akçeyi yedinden vakıf için bi’t-tamâm alıp kabz edip ber-vefk-i muharrer mu‘accelesine mahsûben meremmât ve binâsına kendi mâlından etmeğe izin verdim ba‘de’l-yevm icâre-i mü’eccele-i mezbûresini mâh be-mâh cânib-i vakfa edâ edip keyfe mâ yeşâ sâir emsâli gibi mutasarrıf olsun dedikde gıbbe’t-tasdîki’ş-şer‘î mâ-vaka‘a sebt olundu. Fî-evâili Muharremi’l-harâm min-şühûri sene sitte ve ışrîn ve elf. Şühûdü’l-hâl: Ali Çelebi b. ( ) Mi‘mâr, Hüseyin Çelebi b. Ömer, Ferhad Bey b. ( ) el-câbî ve gayruhüm.