Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 275 Hüküm no: 217 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski imaret mahallesinden Ali Bey b. Abdullah’ın vakfettiği evlerin Haremeyn Vakfı mütevellisi tarafından Hüseyin Çavuş’a kiralandığı Mahmiye-i İstanbul’da Haremeyn-i Şerîfeyn Vakfı’na bi’l-fi‘il mütevellî olan el-Hâc Hasan Bey b. Mehmed nâm bevvâb-ı sultânî meclis-i şer‘de bâ‘isü’l-kitâb fahrü’l-cüyûş Hüseyin Çavuş b. ( ) mahzarında bi’t-tevliye ikrâr ve takrîr-i kelâm edip mahmiye-i merkūmede Eski İmâret mahallesinde sâkin iken bundan esbak vefât eden Ali Bey b. Abdullah hâl-i hayâtında iken mahalle-i merkūmede vâki‘ hudûdunun iki tarafı Ali Efendi b. ( ) ve iki tarafı tarîk-i hâssa müntehî olup tûlen otuz üç arzen sekiz be-hesâb-ı şatrancî iki yüz altmış zirâ‘ arsa üzere mebnî büyût-ı müte‘addideyi müştemil olan mülk menzilini evvelâ kendi nefsine ba‘dehû fukarâ-i Haremeyn-i Muhteremeyn’e âid olmağın îcârı lâzım geldikde tâlibîne arz olunup ragabât-ı nâs münkatı‘a oldukdan sonra müşârun-ileyh Hüseyin Çavuş altı bin akçe icâre-i mu‘accele ve yevmî ikişer akçe icâre-i müeccele ve meremmât ve binâsına sarf ettiği meblağ mu‘accelesine mahsûb olmak üzere istîcâra tâlib olup ziyâde ile tâlib-i âhar zuhûr etmeyip vech-i meşrûh üzere îcâr vakfa enfa‘ olmağın ben dahi menzil-i mezbûru târîh-i kitâbdan altı bin akçe icâre-i mu‘accele ve yevmî ikişer akçe icâre-i müeccele hesâbı üzere mûmâ-ileyh Hüseyin Çavuş’a tevliyetim hasebi ile îcâr eyledim. Ol dahi ber-vech-i muharrer istîcâr ve kabûl ettikden sonra icâre-i mu‘accelesi olan meblağ-ı mezbûr altı bin akçeyi yedinden bi’t-tamâm alıp kabz eyledim. Ba‘de’l-yevm ta‘yîn olunan icâre-i müeccelesin cânib-i vakfa edâ edip keyfe mâ yeşâ sâir emsâli gibi mutasarrıf olsun dedikde gıbbe’t-tasdîk mâ-vaka‘a sebt olundu. Fî-evâsıtı Saferi’l-hayr min-şühûri sene seb‘a ve ışrîn ve elf. Şühûdü’l-hâl: Mehmed Çelebi b. ( ) el-Müezzin, Hüseyin Çelebi b. Ömer, el-Hâc İbrahim b. Hüseyin, Ali Çelebi b. Sinan ve gayruhüm.