Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 283 Hüküm no: 227 Orijinal metin no: [73b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Yusuf b. Hamza’nın para vakfından kendisini azat eden Kamile’ye hisse verildiği Ta‘allaka bi-mâ fîhî nazara’l-fakīr ileyhi sübhânehû Ömer el-me’mûr bi-tefahhusi’l-evkāf -ufiye anhû- Nukilet ani’l-sicilli’l-mahfûz harrerehü’l-fakīr ileyhi sübhânehû Mehmed b. Yusuf el-müvellâ hilâfeten bi-Kasımpaşa -ufiye anhümâ- Budur ki Galata hâricinde Kasımpaşa’da Piyale mahallesi sâkinelerinden Fâtıma bt. Abdullah tarafından husûs-ı âti’z-zikre Ahmed b. Ali ve Receb b. Ahmed şehâdetleriyle vekâleti sâbite mezbûr Fâtıma’nın zevci Ferhad b. Abdullah meclis-i şer‘-i şerîf-i lâzımü’t-tevkīrde işbu bâ‘isü’l-kitâb Emir Ali b. Mehmed muvâcehesinde üzerine takrîr-i da‘vâ edip bundan akdem zevcem Fâtıma’nın ceddesi olan Kamile bt. Abdullah’ın mu‘takı Hacı Yusuf b. Hamza Haremeyn-i Şerîfeyn’e üç bin akçe vakfedip onu on bir mu‘âmele-i şer‘iyye üzere murâbahasından hâsıl olan akçeden her senede yüz akçe mu‘takası Kamile’ye şart ve ta‘yîn edip mâ‘adâsını Haremeyn-i Şerîfeyn mütevellîsi zabt eyleye deyip Kamile’den Kızı Emine’ye ki zevcemin vâlidesi idi kızı Fâtıma’ya intikāl etmişdir mezbûr Emir Ali hilâf-ı şer‘-i şerîf zikr olunan üç bin akçeye vaz‘-ı yed etmişdir suâl olunup hakkım alıverilmek taleb ederim dedikde gıbbe’s-suâl mezbûr Emir Ali bende Haremeyn-i Şerîfeyn vakfından üç bin akçe vardır lâkin mezbûre Kamile’nin mu‘takı Hacı Yusuf’un Haremeyn-i Şerîfeyn’e vakfedip ribhinden Kamile’ye şart ettiği akçe idiği ma‘lûmum değildir deyicek udûl-i Müslimînden Hamza Çelebi b. Ahmed ve Sefer Bey b. Yusuf li-ecli’ş-şehâde hâzırân olup şöyle edâ-i şehâdet-i şer‘iyye ettiler ki zikr olunan üç bin akçe mezbûre Kamile’nin mu‘takı olan Hacı Yusuf Haremeyn-i Şerîfeyn’e vakfedip her sene ribhinden yüzer akçe Kamile’ye şart ve ta‘yîn ettiği akçeden biliriz şehâdet dahi ederiz dediklerinde ba‘de’t-ta‘dîl ve’t-tezkiye şehâdetleri hayyiz-i kabûlde olup zikr olunan üç bin akçeden her sene yüzer akçe murâbahasından mezbûre Fâtıma’ya verilmeğe hükmolundu. Tahrîren fî-evâili Recebi’l-mürecceb li-sene seb‘a ve tis‘în ve tis‘a mi’e el-hicriyye. Şühûdü’l-hâl: Mehmed Efendi b. Mustafa, Mehmed b. Mehmed el-imâm, Haydar Efendi b. Kemal, Seyyid Yusuf b. Seyyid Ali, Receb b. Ahmed, Mehmed Çavuş b. Abdülmennan, Murad Çavuş b. Hızır, İsmail Halîfe b. Hamza Halîfe, Mustafa Çelebi b. ( ) el-kâtib, Kurd b. Hamza ve gayruhüm. Nukilet fi’l-yevmi’l-hâmis min-Şevvâli’l-mükerrem li-sene selâse ve elf.