Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 284 Hüküm no: 228 Orijinal metin no: [73b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüsrev Bey b. Abdullah’ın kiracısı olduğu evin kirasının tespit edilmesi talebi Mahrûse-i İstanbul’da vâki‘ Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân Veli Bey b. Abdullah nâm bevvâb-ı sultânî meclis-i şer‘-i şerîfe gelip takrîr-i kelâm ve ta‘bîr ani’l-merâm edip evkāf-ı mezbûreden olup mahrûse-i mezbûrede Cerrâhbaşı mahallesinde vâki‘ lede’l-ahâlî ma‘lûmü’l-hudûd olan menzilde Hüsrev Bey b. Abdullah nâm kimesne yevmî iki akçe icâre-i müeccele ve beş bin akçe icâre-i mu‘accele ile sâkin olup ücreteyn-i mezbûreteyn ecr-i mislinden noksân üzeredir kıbel-i şer‘den üzerine varılıp ecr-i misli keşf ve tahrîr olunması matlûbumdur dedikde savb-ı şer‘den Mevlânâ Mehmed Efendi ve Hâssa mi‘mârlardan Üstâd Ali b. Halil irsâl olunup zeyl-i kitâbda mastûretü’l-esâmî olan Müslimîn ile menzil-i mezbûrun üzerine varılıp müste’cir-i mezbûr Hüsrev Bey mahzarında keşf olundukda menzil-i mezbûrun yevmî üç akçe ücret-i müecceli ve otuz bin akçe icâre-i mu‘acceli ecr-i mislidir deyu mi‘mâr-ı mezbûr ve sâir ehl-i vukūf Müslimânlar ittifâk eylediklerinde mezbûr Hüsrev Bey dahi menzil-i mezbûrun ücreteyn-i mezbûreyn ile istîcâr ve kabûl eylediğini mevlânâ-yı mezbûr mahallinde tahrîr edip ba‘dehû meclis-i şer‘a gelip haber vermeğin mâ-hüve’l-vâkı‘ bi’t-taleb ketb olundu. Tahrîren fî-evâsıtı şehri Rebî‘i’l-âhir min-şühûri sene semân ve ışrîn ve elf. Şühûdü’l-hâl: eş-Şeyh Mehmed Çelebi b. Mahmud Efendi el-imâm, Abdürrahim Efendi b. Emrullah, Süleyman Efendi b. Mehmed, Hüseyin Çelebi b. ( ), es-Seyyid Mehmed b. es-Seyyid Haydar, Mustafa Efendi b. Mehmed el-imâm ve gayruhüm.