Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 295 Hüküm no: 253 Orijinal metin no: [72a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise Hatun’un kendi hissesi ile beraber vasileri olduğu küçük çocukların menzil hisselerini satması Medîne-i Üsküdar’a muzâfe Kartal kasabası ahâlîsinden olup bundan akdem vefât eden Mehmed Ağa b. Abdullah b. Abdülmennan’ın verâseti zevce-i menkûha-i metrûkesi Şerife Nefise Hatun bt. Ali ile zevce-i uhrâsından mütevellid sulbî sagīr oğlu İbrahim Edhem ve zevce-i mezbûreden mütevellide sulbiye sagīre kızı Şerife Hadice’ye münhasıra ve tashîh-i meselesi yirmi dört sehmden olup sihâm-ı mezbûreden üç sehmi zevcesi mezbûreye ve on dört sehmi sagīr-i merkūma ve yedi sehmi sagīre-i mezbûreye isâbeti tahakkukundan sonra kendi nefsinden asıl ve sagīrân-ı mezbûrânın tesviye-i umûrlarını rü’yete vasiyy-i mansûbeleri zâtı ta‘rîf-i şer‘î ile mu‘arrefe olan zevce-i mezbûre Şerife Nefise Hatun meclis-i şer‘-i şerîf-i enverde işbu bâ‘isü’l-vesîka li-ebeveyn er karındaşı Bağcı Yusuf b. el-mezbûr Ali mahzarında bi’l-asâle ve bi’l-vesâye ikrâr-ı tâm ve takrîr-i kelâm edip kasaba-i mezbûrede vâki‘ bir tarafdan Ârif Reis menzili ve etrâf-ı selâsesi tarîk-i âm ile mahdûd fevkānî iki bâb oda ve sofa ve bir kenîf ve âbdesthâne ve kiler ve tahtânî bir bâb oda ve kenîf ve bir matbah ve sokak kapısını müştemil bir bâb menzil zevcem ve mûrisim müteveffâ-yı mezbûrun hayatında ile’l-vefât bâ-hüccet yedinde mülkü olup ba‘de vefâtihî ber-tashîh-i mezkûr benimle vasîleri olduğum sagīrân-ı mezbûrâna mevrûs olmağla ben menzil-i mezkûr ber-tashîh-i mezkûr ırsen mâlike olduğum hisse-i şâyi‘amı âhara bey‘e câzime olup lâkin menzil-i mezbûr mürûr-ı eyyâm ile müşrif-i harâb ve mâil-i türâb olup hâsılı harcına vefâ etmeyip ve sagīrân-ı mezbûrânın dahi nafakaya eşedd-i ihtiyâcları olmağla ol vechile menzil-i mezkûrda hisseleri benim hisse-i mezkûrem ile ma‘an semen-i misliyle âhara bey‘ ve semeni istirbâh ve istiğlâl olunmak sagīrân-ı mezbûrân haklarında enfa‘ olduğu zeyl-i vesîkada muharrerü’l-esâmî Müslimîn ihbârlarıyla zâhir olmağın ol vechile menzil-i mahdûd-ı mezkûru mesûğ-ı şer‘îye binâen kıbel-i şer‘den me’zûnen bi’l-asâle ve bi’l-vesâye mahâllinde sûk-ı sultânîde ve mecma‘-ı nâs olan mahallerde münâdî nidâsıyla lede’l-müzâyede ve inkıtâ‘i’r-rağbe beş yüz guruşda karındaşım merkūm Yusuf üzerinde karâr ve ziyâde ile tâlib-i âharı zuhûr etmeyip ve meblağ-ı mezkûr menzil-i mezbûrun el-yevm semen-i misli idüğü ihbâr olunmağla menzil-i mezkûru bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ile merkūm Yusuf Ağa meblağ-ı [mezbûr] beş yüz guruşa bi’l-asâle ve bi’l-vesâye bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ve kabûl edip semeni olan meblağ-ı mezkûru bana def‘ ü teslîm, ben dahi yedinden bi’l-asâle ve bi’l-vesâye ahz u kabz ve müteveffâ-yı mezbûrun defter-i kassâmına idhâl etmemle ba‘de’l-yevm menzil-i mahdûd-ı mezkûrda benimle sagīrân-ı mezbûrânın kat‘an alâka ve medhalleri kalmayıp mezbûr Yusuf Ağa mülk-i müşterâsı ve hakk-ı sırfı olmuşdur, keyfe mâ yeşâ ve hasbe mâ-yahtâr mâlikler ve mutasarrıflar olsun dediği. Fî 14 B sene 1257 Şuhûdü’l-hâl: Kasaba-i mezbûre Sandık Emîni el-Hâc Mehmed Ağa, Kasaba-i mezbûre Muhtârı el-Hâc Hüseyin Ağa, Tahtacı Mehmed Salih Ağa, Muhzır Eğrikapılı Mehmed Ağa, el-Hâc Halil Ağa b. Mustafa ve gayruhum.