Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 294 Hüküm no: 252 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Parise’nin vasisi olan babası Haçadur’un azledilerek yerine başkasının vasi tayini Medîne-i Üsküdar’a muzâfe Kādı karyesinde mütemekkine iken bundan akdem hâlike olan Aziz bt. Haçadur Nasrâniyenin sadriye sagīre kızı Parise’nin babası ve velîsi Haçadur v. Harim nâm zimmî sagīre-i mezbûrenin anası mersûmeden mevrûs malını mütlif ve mübezzir olup ol vechile mahmûdü’l-hâl olmamağla sagīre-i mersûmenin anası hâlike-i mersûmeden mevrûs malını hıfza ve kemâ-hüve hakkuhû sagīre-i mersûmenin tesviye-i umûrunu rü’yete bir vasî nasbı lâzım ve mühim olduğu zeyl-i rakīmde muharrerü’l-esâmî bî-garaz mevsûku’l-kelim kimesnelerin ihbârlarıyla tahakkuk etmeğin sagīre-i mersûmenin min-kıbeli’l-üm ceddesi olup müstakīme ve her vechile vesâyet uhdesinden gelmeğe kādire idüğü zâhir olan işbu hâmiletü’r-rakīm Karpana bt. Mardıros Nasrâniyeyi hâkim-i hâsim-i vâlâ cenâb -vaffakallâhu te‘âlâ bi’s-sıdk ve’s-savâb rafe‘a kudretü’l-vehhâb- efendi hazretleri dahi sagīre-i mersûmenin tesviye-i umûrunu rü’yete vasî nasb [ü] ta‘yîn buyurduklarında ol dahi vesâyet-i mezkûreyi kabûl eylediğinden sonra vasiyy-i mersûme Karpana Nasrâniyenin talebiyle hâkim-i müşârün-ileyh hazretleri sagīre-i mersûmenin nafakası için malı nemâsından işbu târîh-i rakīmden kadr-ı ma‘rûf idüğü bi’l-ihbâr zâhir olan beher şehr üçer yüz guruş farz ve takdîr buyurup meblağ-ı mezkûru sagīre-i mersûmenin nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer sagīre-i mersûmenin malı nemâsına rücû‘a mersûme Karpana Nasrâniyeye izin vermeleriyle mâ-vaka‘a [bi’t-taleb ketb olundu]. Fî 6 L sene [12]56. Şuhûdü’l-hâl: Mustafa Ağa b. Hasan, Mehmed Salih b. Mehmed, Mehmed Ağa b. el-Hâc Ali, Artin v. Haçadur, Mardıros v. Haçadur, İşnan oğlu Bogos, Sahak v. Agob ve gayruhum.